InterPress.ge xəbər verir ki, Gürcüstanın “Vətəndaşlıq haqqında” Orqanik Qanununun 32²-ci maddəsinə əsasən, başqa ölkənin vətəndaşlığını əldə etdiyi üçün Gürcüstan vətəndaşlığını itirmiş şəxslər 2027-ci il yanvarın 1-dək vətəndaşlığın bərpası üçün müraciət edə bilərlər.
Qanuna əsasən, vətəndaşlığın bərpası üçün müraciət edən şəxslər Gürcüstanın dövlət dilini müəyyən edilmiş səviyyədə bilməli və qanunla nəzərdə tutulan digər məhdudiyyətlərə düşməməlidirlər. Bu prosedur çərçivəsində vətəndaşlığın bərpası şəxsin digər ölkənin vətəndaşlığından imtina etməsini tələb etmir.
Bundan başqa, 2018-ci il avqustun 15-dək barəsində başqa ölkənin vətəndaşlığını əldə etməsi səbəbindən Gürcüstan vətəndaşlığının itirilməsi ilə bağlı qərar qəbul edilməmiş şəxslər də 2027-ci il yanvarın 1-dək Gürcüstan vətəndaşlığını saxlamaq üçün müraciət etmək hüququna malikdirlər.
Qanunvericiliyə görə, Gürcüstan vətəndaşı başqa ölkənin vətəndaşlığını əldə etməzdən əvvəl Gürcüstan vətəndaşlığını saxlamaq üçün dövlətin razılığını almalıdır. Belə razılıq olmadan xarici vətəndaşlığın əldə edilməsi Gürcüstan vətəndaşlığının itirilməsi ilə nəticələnə bilər.
Müvafiq müddəalar Gürcüstanın “Vətəndaşlıq haqqında” Orqanik Qanununun 21¹ və 32²-ci maddələrində əksini tapıb.
Vətəndaşlıq məsələsi ilə bağlı hüquqi statusunda qeyri-müəyyənlik olan şəxslərə sənədlərini yoxlamaq və qanunla müəyyən edilmiş müddət ərzində müvafiq müraciəti təqdim etmək tövsiyə olunur.
