32 yaşlı Sima Quliyeva əməliyyatdan sonra komaya düşüb - Ailəsi etiraz edir

Tbilisidə yerləşən "Birinci Doğum Klinikası" qarşısında gərginlik yaşanır. 32 yaşlı Sima Quliyevanın ailə üzvləri pasiyentin təcili olaraq başqa tibb müəssisəsinə köçürülməsini tələb edirlər.

InterPress.ge xəbər verir ki, ailənin sözlərinə görə, əməliyyatdan sonra qadının vəziyyəti ağırlaşıb və ona lazımi tibbi yardım göstərilmir.

Yaxınları bildirirlər ki, 15 gündür klinikada müalicə alan Sima Quliyevanın böyrəkləri fəaliyyətini dayandırıb və ona dializ proseduru lazımdır. Onların iddiasına görə, klinikadakı dializ aparatı nasaz olduğu üçün proseduru həyata keçirmək mümkün deyil.

Pasiyentin yaxınlarından biri bildirib ki, qadının yarası irinləyib və ona lazımi qulluq göstərilmir.

"Sima kəskin böyrək çatışmazlığından əziyyət çəkir. Artıq 15 gündür xəstəxanadadır. Yarası irinləyib və lazımi tibbi yardım göstərilmir. Doğum klinikasında infeksiyalı xəstənin nə işi var? Niyə vaxtında başqa klinikaya köçürülmədi? İndi vəziyyəti daha da ağırlaşıb. Dializ aparatı isə nasazdır və proseduru həyata keçirə bilmirlər", – deyə ailə üzvü bildirib.

Sima Quliyevanın anasının sözlərinə görə, həkim əməliyyatın cəmi 15 dəqiqə davam edəcəyini və qızının həmin gün evə buraxılacağını demişdi. Lakin əməliyyatdan sonra onun səhhəti getdikcə pisləşib.

"Kiçik bir əməliyyat idi. Həkim dedi ki, təhlükəli heç nə yoxdur, 15 dəqiqəlik əməliyyatdır və axşam evə gedəcəksən. Amma bu baş vermədi. Həmin gündən qızımın vəziyyəti daha da ağırlaşır. Heç kim mənə kömək etmir. Səhiyyə Nazirliyindən və "Aversi" klinikasından xahiş edirəm ki, övladımın başqa klinikaya köçürülməsinə kömək etsinlər. Onun 6 yaşlı övladı var, onu taleyin ümidinə buraxmayın", – deyə ana TV Pirveliyə bildirib.

Klinika nümayəndəsi isə ailə üzvlərinə pasiyentin başqa klinikaya köçürülməsi ilə bağlı qərarı özünün vermədiyini bildirib.

"Mən çalışıram, zənglər edirəm. Qərarı mən qəbul etmirəm", – deyə klinika nümayəndəsi qeyd edib.

Klinika qarşısına toplaşan şəxslər bildiriblər ki, Sima Quliyeva əməliyyatdan sonra ağırlaşmalar səbəbindən vəfat edən 35 yaşlı qadınla eyni palatada yerləşdirilib. Həmin qadının ailəsi də həkimlərin məsuliyyətə cəlb olunmasını tələb edir.

Hadisə ilə əlaqədar **"Birinci Doğum Klinikası"**nın qarşısına polis əməkdaşları cəlb olunub.