İran Hörmüz boğazında ABŞ-la əlaqə üçün “qaynar xətt” yaradılmasına razılaşıb
İran Hörmüz boğazında ABŞ və digər ölkələrlə yarana biləcək anlaşılmazlıqların qarşısını almaq və onların operativ həllini təmin etmək məqsədilə xüsusi telefon “qaynar xətti”nin yaradılmasına razılıq verib.
InterPress.ge xəbər verir ki, bu barədə İran parlamentinin sədri və İsveçrədə keçirilən danışıqlarda İran nümayəndə heyətinin rəhbəri Məhəmməd Baqir Qalibaf bildirib.
“İran və ABŞ koordinasiya mexanizmlərinin – telefon qaynar xəttinin və xüsusi mərkəzin yaradılması barədə razılığa gəliblər. Hər hansı anlaşılmazlıq və ya problem yaranacağı halda, gəmilər həmin mərkəzlə əlaqə saxlaya biləcəklər”, – deyə Qalibaf İsveçrədə keçirilən danışıqlardan qayıtdıqdan sonra bildirib.
Onun sözlərinə görə, bundan sonra Hörmüz boğazı İranla əldə edilmiş razılaşmalar əsasında idarə olunacaq və bir daha müharibədən əvvəlki vəziyyətə qayıtmayacaq.
Qalibaf qeyd edib ki, İran beynəlxalq qanunlara dəqiq əməl edəcək və hər hansı problem və ya anlaşılmazlığın aradan qaldırılması üçün operativ addımlar atacaq.
“Təbii ki, necə ki, problemlər Livanda və ya başqa yerlərdə yarana bilər, eyni problemlər Hörmüz boğazında da baş verə bilər. Gördüyünüz kimi, bəzi gecələr hətta toqquşmalar da baş verib”, – deyə Qalibaf bildirib.
Onun sözlərinə görə, yaradılacaq qaynar xətt “təhlükəsizliyin və gəmi hərəkətinin ən yüksək səviyyədə təmin olunmasına” kömək edəcək.
Qaynar xəttin konkret təyinatı ilə bağlı suala cavab verən Qalibaf bildirib: “Əgər amerikalıların hər hansı etirazı olarsa və ya hər hansı gəminin marşrutla bağlı dəqiqləşdirməyə ehtiyacı yaranarsa, onlar əlaqə saxlaya biləcəklər”.
Qalibaf, həmçinin qeyd edib ki, İsveçrədə keçirilən danışıqlar zamanı İranın dondurulmuş vəsaitlərindən 12 milyard dollar məbləğində vəsaitə çıxış əldə etməsi və neftə tətbiq olunan sanksiyaların aradan qaldırılması ilə bağlı məsələlər üzrə yekun razılıq əldə olunub.
