İran Trampın bəyanatını təkzib etdi: Yekun razılaşma ilə bağlı qərar qəbul edilməyib

İran Xarici İşlər Nazirliyinin sözçüsü Esmayıl Bəqayi ABŞ-la yekun razılaşmanın əldə olunması ilə bağlı yayılan məlumatların həqiqəti əks etdirmədiyini bildirib.

InterPress.ge xəbər verir ki, CNN-in İran mediasına istinadən yaydığı məlumata görə, Bəqayi ABŞ-la yekun sazişə dair xəbərləri "yalnız spekulyasiya" adlandırıb və Tehranın hələlik hər hansı razılaşma ilə bağlı son qərar qəbul etmədiyini vurğulayıb.

Onun sözlərinə görə, Qətər və Pakistan vasitəçi qismində fəal rol oynayırlar, lakin ABŞ-ın hərəkətləri diplomatik prosesə təsir göstərir.

"Əvvəldən danışıqların statusu bizim üçün aydın idi və mətnin böyük hissəsi artıq tamamlanmışdı. Lakin amerikalılar öz mövqelərini dəyişirdilər", – deyə Bəqayi bildirib.

İran XİN sözçüsü qeyd edib ki, Tehran özünün "qırmızı xətlər" kimi müəyyən etdiyi məsələlərdə güzəştə getməyəcəyini nümayiş etdirib.

"İran hələlik heç bir razılaşma ilə bağlı yekun qərar qəbul etməyib", – deyə Esmayıl Bəqayi vurğulayıb.