İrakli Kirtsxalia: Görünür, Bidzina İvanişvilinin əsas günahı onun peşəkarlığıdır
Parlament çoxluğunun lideri İrakli Kirtsxalia bildirib ki, "Gürcü Arzusu"nun yerli və xarici rəqibləri üçün Bidzina İvanişvilinin əsas "günahı" onun peşəkarlığı və siyasi uzaqgörənliyidir.
InterPress.ge xəbər verir ki, bu barədə parlament çoxluğunun lideri İrakli Kirtsxalia sosial şəbəkədə paylaşım edib.
Kirtsxalia qeyd edib ki, Bidzina İvanişvili 2012-ci ildə "Vahid Milli Hərəkat" hakimiyyətinin dəyişməsində həlledici rol oynayıb və hazırda hakim partiyanın fəxri sədri, eləcə də siyasi şuranın üzvü kimi siyasi proseslərdə iştirak edir.
Onun sözlərinə görə, "Gürcü Arzusu" 2024-cü il parlament seçkilərində məhz bu konfiqurasiya ilə seçicilərin qarşısına çıxıb və Bidzina İvanişvili seçki siyahısında birinci olub.
“Bu fonda Gürcüstanın baş nazirinin və komandanın liderlərindən birinin Bidzina İvanişvilini "siyasətin qrossmeysteri" adlandırması onun partiyadaxili müzakirələrdə iştirak etdiyini, xüsusi analitik bacarıqlara malik olduğunu və məsləhətlərinin nəzərə alındığını təsdiqləyir. Liderliklə keçirilən görüşlərdə mövcud problemlərin həlli üçün əksər hallarda ən yaxşı yolları tapır. Radikallar və onların xarici himayədarları isə bunu guya "təkhakimiyyətlilik" kimi təqdim edirlər”, – deyə Kirtsxalia bildirib.
O vurğulayıb ki, "Gürcü Arzusu" komandasının heç bir üzvü Bidzina İvanişvilinin kiməsə öz fikrini zorla qəbul etdirdiyini və ya hansısa qərarı məcburi şəkildə diktə etdiyini deməyib.
“Diqqətçəkən məqam odur ki, vaxtilə siyasi komandanın üzvü olmuş, sonradan partiyanı tərk edərək "Gürcü Arzusu"na qarşı mübarizə aparan şəxslər də bunu iddia etmirlər. Eyni zamanda heç kim inkar etmir ki, onun təcrübəsi, şəxsi keyfiyyətləri və bacarıqları sayəsində müxtəlif məsələlərin müzakirəsi zamanı, adətən, ən səriştəli mövqeni məhz o ifadə edir. Onun liderliyinin əsasını da məhz bu təşkil edir”, – deyə o qeyd edib.
Kirtsxalianın sözlərinə görə, belə çıxır ki, hakim partiyanın yerli və xarici rəqibləri üçün Bidzina İvanişvilinin əsas "təqsiri" onun peşəkarlığıdır.
“Bu insanlar yerli radikalların yenidən hakimiyyətə qayıtması və ölkəmizin xarici maraqlara tabe etdirilməsi cəhdlərinə baxmayaraq, Bidzina İvanişvilinin onların hesablamalarını bir neçə addım qabaqlamasını qəbul edə bilmirlər. O, problemlərin həlli üçün operativ şəkildə ən yaxşı yolları tapır və bu da daxili agenturanı və onların xarici himayədarlarını qarşıya qoyduqları məqsədlərdən getdikcə daha çox uzaqlaşdırır.
Məhz bu səbəbdən onlar qəzəblənir, müxtəlif konspirasiya nəzəriyyələri irəli sürür, əsassız ittihamlar səsləndirir və mövcud olmayan reallıq yaratmağa çalışırlar. Təəssüf ki, onlar bu absurd vəziyyətdə hələ uzun müddət qalmağa məcbur olacaqlar”, – deyə İrakli Kirtsxalia bildirib.
