Şalva Papuaşvili: Gürcüstan və Azərbaycan arasındakı münasibətlər qarşılıqlı hörmət və milli maraqlara əsaslanır

Gürcüstan parlamentinin sədri Şalva Papuaşvili Azərbaycan xalqını Müstəqillik Günü münasibətilə təbrik edib.

InterPress.ge xəbər verir ki, Şalva Papuaşvili bu barədə Azerbaijan Respublikasının Müstəqillik Gününə həsr olunmuş tədbirdə çıxışı zamanı danışıb.

Parlament sədrinin sözlərinə görə, Gürcüstan və Azərbaycan arasında münasibətlər hər zaman qarşılıqlı suverenliyə, müstəqilliyə və milli maraqlara hörmət, eləcə də səmimi dialoq üzərində qurulub.

“Biz hesab edirik ki, hər bir ölkənin öz gələcəyini müəyyənləşdirmək, milli kimliyini qorumaq və milli maraqları əsasında hərəkət etmək hüququ var. Gürcüstan və Azərbaycan arasındakı münasibətlər bunun ən yaxşı nümunəsidir”, – deyə Papuaşvili bildirib.

O qeyd edib ki, həqiqi tərəfdaşlıq eynilik üzərində deyil, fərqliliklərə hörmət prinsipi üzərində qurulur.

“Güclü münasibətlər o zaman formalaşır ki, dövlətlər bir-birini öz tarixi, ənənələri və legitim milli maraqları olan bərabər tərəfdaş kimi qəbul edir”, – deyə parlament sədri vurğulayıb.

Şalva Papuaşvili bildirib ki, müstəqilliyin əsas dəyəri dövlətə qərarları yalnız öz xalqının iradəsinə uyğun şəkildə qəbul etmək imkanı verməsidir.

Onun sözlərinə görə, müasir dünyada qlobal maraqların üstün tutulması və ideoloji eyniliyin zorla qəbul etdirilməsi cəhdləri müşahidə olunur.

“Tarix dəfələrlə göstərib ki, fərqliliklərə məhəl qoyulmadıqda və müxtəliflik məhdudlaşdırıldıqda gec-tez ciddi problemlər yaranır. Sovet İttifaqının xalqların maraqlarını eyniləşdirmək, onların tarixini və kimliyini görməzlikdən gəlmək cəhdləri bunun nümunəsidir”, – deyə o qeyd edib.

Papuaşvili çıxışında regionda sülhün əhəmiyyətinə də toxunub və bildirib ki, Gürcüstan hər zaman Cənubi Qafqazda sülh və rifahın tərəfdarı olub.

Onun sözlərinə görə, Azərbaycan və Ermənistan arasında münasibətlərin normallaşmasına yönəlmiş addımlar göstərir ki, münaqişələrin həlli yalnız iki suveren dövlət arasında birbaşa dialoq və qarşılıqlı hörmət əsasında mümkündür.

“Münaqişələrin həlli məhz belə yanaşma ilə həyata keçirilməlidir, üçüncü tərəflərin müdaxiləsi ilə yox. Xarici müdaxilələr adətən münaqişə tərəflərinin deyil, başqa dövlətlərin maraqlarına xidmət edir və sülh yolunda əlavə maneələr yaradır”, – deyə parlament sədri bildirib.

Şalva Papuaşvili əlavə edib ki, Gürcüstan Baş naziri İrakli Kobaxidzenin Azərbaycana son səfəri çərçivəsində əldə olunan razılaşmalar Orta Dəhlizin tranzit potensialının daha səmərəli istifadəsinə və hər iki ölkənin iqtisadi inkişafına töhfə verəcək.

O həmçinin vurğulayıb ki, iki ölkə parlamentləri arasında əməkdaşlıq da strateji tərəfdaşlığın inkişafında mühüm rol oynayır.

Papuaşvilinin sözlərinə görə, Azərbaycan Milli Məclisinin sədri Sahibə Qafarova bir ay əvvəl parlamentlərarası münasibətlərin inkişafına verdiyi xüsusi töhfəyə görə Gürcüstan parlamentinin ilk fəxri medalı ilə təltif olunub.

Sonda parlament sədri Azərbaycan xalqına sülh, rifah və uğurlar arzulayıb.