Kaxa Kaladze: Aİ səfiri çağırılmalı və konkret suallar verilməlidir

Tbilisi meri Kaxa Kaladze Gürcüstanda Avropa İttifaqının səfirinin açıqlamalarına sərt reaksiya verib.

InterPress.ge xəbər verir ki, Kaladze bildirib ki, ilk addım olaraq Pavel Herçinski Xarici İşlər Nazirliyinə çağırılmalı və ona konkret suallar ünvanlanmalıdır.

Onun sözlərinə görə, Gürcüstana “barmaq silkələyən” yanaşma qəbuledilməzdir və ölkəyə “dostlar lazımdır, ağalar yox”.

Kaladze qeyd edib ki, səfirin bəyanatında müharibə və vətəndaş qarşıdurması ilə bağlı fikirlərin səsləndirilməsi narahatedicidir.

“Əgər kimsə Gürcüstana öz iradəsini diktə etmək istəyirsə və ölkənin hansısa ‘şıltaqlıqlara’ uyğun idarə olunmasını gözləyirsə, bu mümkün deyil. Gürcüstan suveren və demokratik dövlətdir”, – deyə o vurğulayıb.

Tbilisi meri əlavə edib ki, ölkə öz siyasəti ilə milli maraqlara xidmət edir və bu kurs dəyişməyəcək.

Qeyd edək ki, Pavel Herçinski Brüsseldə çıxışı zamanı Gürcüstanın artıq düzgün trayektoriyada olmadığını və hakimiyyətin ölkəni Avropa İttifaqından uzaqlaşdırdığını bildirmişdi.