Mamuka Mdinaradze: “Yeni rolumla hüquq-mühafizə orqanlarının müsbət dinamikasını daha da gücləndirəcəyəm”

Gürcüstanda dövlət naziri vəzifəsinə namizəd və gələcək vitse-premyer Mamuka Mdinaradze yeni təyinatı ilə bağlı açıqlama verib.

InterPress.ge xəbər verir ki, Mdinaradze “İmedi Live” verilişində çıxışı zamanı bildirib ki, onun əsas məqsədi hüquq-mühafizə orqanlarının fəaliyyətində əldə olunan müsbət nəticələri daha da gücləndirməkdir.

Onun sözlərinə görə, bu kadr dəyişikliyi təxminən 7-8 ay əvvəl hakim komanda tərəfindən planlaşdırılmışdı.

Mdinaradze qeyd edib ki, yeni vəzifəsində əsas funksiyası güc strukturları arasında koordinasiyanı təmin etmək olacaq.

“Bu o demək deyil ki, hansısa qurum rəhbərlərinə birbaşa göstərişlər veriləcək, lakin hüquq-mühafizə orqanları arasında koordinasiya funksiyası mənim üzərimdə olacaq və çalışacağam ki, bu sahədə əldə olunan müsbət dinamikanı daha da gücləndirim”, – deyə o bildirib.

O əlavə edib ki, son aylarda korrupsiya ilə mübarizə, terrorizmə qarşı tədbirlər, antinarkotik kampaniyalar və mütəşəkkil cinayətkarlıqla mübarizə istiqamətində mühüm nəticələr əldə olunub və bu proses davam etdiriləcək.