Parlamentdə yeni konstitusiya iddiası – 89 deputatın imzası təsdiqləndi

Gürcüstan parlamentində bir sıra müxalif partiyaların qadağan olunması ilə bağlı yeni konstitusiya iddiası üzrə deputatların imzalarının həqiqiliyi təsdiqlənib.

InterPress.ge xəbər verir ki, Parlamentin Prosedur Məsələləri Komitəsi 89 deputatın imzasını yoxlayaraq onların etibarlı olduğunu müəyyən edib.

Qeyd olunub ki, qanunvericiliyə əsasən, parlament üzvlərinin azı beşdə biri Konstitusiya Məhkəməsinə müraciət etmək hüququna malikdir və müraciətdən əvvəl imzaların həqiqiliyi yoxlanılmalıdır.

Komitə bugünkü iclasında belə nəticəyə gəlib ki, təqdim olunan imzalar konstitusiya iddiasının qaldırılması üçün kifayət edir.

Məlumata görə, Gürcü Arzusu Konstitusiya Məhkəməsinə yeni iddia ilə müraciət etməyə hazırlaşır və əvvəlki müraciəti geri götürəcək. Yeni iddiada qadağan olunması tələb edilən partiyalar siyahısına “Federalistlər” də əlavə edilib.

Xatırladaq ki, hakim partiya ötən ilin 31 oktyabr tarixində də Vahid Milli Hərəkat, Koalisiya Dəyişiklik üçün və Lelo - Güclü Gürcüstan partiyalarının qadağan olunması tələbi ilə Konstitusiya Məhkəməsinə müraciət etmişdi.