“Vahid Neytral Gürcüstan” geniş bəyanat yaydı – müxalifət, ABŞ və “deep state” ilə bağlı iddialar
“Vahid Neytral Gürcüstan” partiyası müxalifətin fəaliyyətinə və son siyasi proseslərə dair geniş bəyanat yayıb.
InterPress.ge xəbər verir ki, bəyanatda müxalifətin liderlərindən biri Tamar Çerqoleişvili-nin ABŞ-a səfəri və xarici tərəfdaşlara fəaliyyət planının təqdim olunması ilə bağlı açıqlamasına münasibət bildirilib.
Bəyanatda qeyd olunur ki, yenidən birləşmiş “Milli Hərəkat”ın nəinki konkret planı, hətta müstəqil mövqeyi belə yoxdur. Onların yalnız xarici qüvvələrin tapşırıqlarını yerinə yetirdiyi və ölkədə proseslərin radikallaşdırılması üçün alətə çevrildiyi vurğulanır.
“‘Vahid Neytral Gürcüstan’ adından ictimaiyyətin diqqətini son dövrlərin ən mühüm faktlarından birinə yönəltmək istəyirik ki, hesab edirik bu məsələ lazımi analiz və qiymətləndirmə olmadan qalıb.
Bir vaxtlar vahid olan, daha sonra parçalanan və indi yenidən birləşən ‘Milli Hərəkat’ın liderlərindən biri, Tamar Çerqoleişvili bəyan edib ki, onlar ABŞ-a gedirlər ki, xarici himayədarlarına hakimiyyəti necə geri qaytarmaq barədə fəaliyyət planı təqdim etsinlər.
Əslində bu bəyanatın absurd olduğu hər kəs üçün aydındır. Çünki yerli radikal müxalifətin – yəni yenidən birləşmiş ‘Milli Hərəkat’ın nəinki planı, hətta müstəqil fikri belə yoxdur. Onlar yalnız xarici tapşırıqları kor-koranə yerinə yetirən və ölkədə proseslərin radikallaşdırılması üçün istifadə olunan alətlərdir.
Eyni zamanda, bu bəyanat bir daha təsdiqləyir ki, onlar üçün hakimiyyətin mənbəyi gürcü xalqı deyil, xarici himayədarlardır və legitimliyi də məhz onlardan gözləyirlər. Üstəlik, əmindirlər ki, əsas qərarlar məhz ABŞ-da qəbul olunur”, – deyə partiyanın bəyanatında qeyd edilir.
Partiya həmçinin bildirir ki, son dövrlərdə Gürcüstan hakimiyyəti ilə ABŞ-ın nüfuzlu rəsmiləri arasında intensivləşən əlaqələr müəyyən siyasi məqsədlərə xidmət edir.
“Qeyd etmək lazımdır ki, son dövrlərdə Gürcüstan hakimiyyətinin yüksək vəzifəli şəxsləri ilə ABŞ-ın nüfuzlu dövlət rəsmiləri arasında artan əlaqələr, müxtəlif forumlarda ünsiyyət, tədbirlərə dəvətlər və telefon danışıqları ‘Gürcü Arzusu’ hakimiyyətini daha komfortlu vəziyyətə salır və bu istiqamətdə təzyiqi azaldır.
Aydındır ki, bu cür metodlar ‘deep state’in fəaliyyət üslubudur və bu dəfə Gürcüstana münasibətdə yaltaqlıq siyasətinin aparılmasına başlanılıb. Məqsəd isə hakimiyyət və cəmiyyətin ayıqlığını zəiflətməkdir. Bu isə, dəfələrlə gördüyümüz kimi, ölkə üçün növbəti fəlakətlə nəticələnə bilər”, – deyə açıqlamada bildirilir.
Bəyanatda vurğulanır ki, hakimiyyət öz siyasi rahatlığını deyil, ölkənin suverenliyini və cəmiyyətin maraqlarını əsas götürməlidir.
“‘Vahid Neytral Gürcüstan’ hesab edir ki, hakimiyyət siyasi komfort deyil, dövlətin suverenliyi və ictimai maraqlar barədə düşünməli və bu ‘siqnallara’ aldanmamalıdır. Çünki həm ABŞ, həm də Avropa ‘deep state’ tərəfindən idarə olunur. Əgər bu gün ABŞ-dan gələn mesajlara uyğun davranılarsa, sabah Avropa ilə bağlı da eyni, prinsipsiz və hakimiyyət üçün komfortlu mövqe seçiləcək.
Aydındır ki, bu yanaşma ölkə və xalqın maraqlarından deyil, şəxsi maraqlardan irəli gələcək və ictimaiyyət bu barədə düzgün məlumatlandırılmalıdır.
Bu kontekstdə xüsusi vurğulamaq lazımdır ki, Donald Trampın ‘deep state’ə qarşı mübarizə apardığı barədə səsləndirilən fikirlər tamamilə yalan və manipulyasiyadır. Əslində ABŞ-da ‘deep state’in rebrendinq prosesi gedir və bu artıq açıq şəkildə görünür.
Hətta demək olar ki, Donald Tramp ‘deep state’in birbaşa təcəssümüdür – onun real simasıdır. O, bir şeyi deyir, başqa cür hərəkət edir: ictimaiyyət qarşısında özünü sülh tərəfdarı kimi təqdim edir, lakin eyni zamanda müharibələri artırır və öz davranışları ilə ‘deep state’in planlarına xidmət edir.
Faktdır ki, Tramp münaqişələri alovlandıran fiqurdur və həm ABŞ-da, həm də Avropada idarəetmə ‘deep state’in əlindədir.
Yuxarıda qeyd olunanları nəzərə alaraq, ‘Vahid Neytral Gürcüstan’ üçün ‘Gürcü Arzusu’nun konformist mövqeyi tamamilə qəbuledilməzdir. Bu səbəbdən, ölkə və xalqın maraqlarından çıxış edərək, hakimiyyətlə açıq televiziya debatlarının keçirilməsini qəti şəkildə tələb edirik ki, cəmiyyətin bütün suallarına ətraflı cavab verilsin”, – deyə bəyanatda qeyd olunur.
