İlia Darçiaşvili Böyük Britaniyada Gürcüstanın səfiri təyin edilib

Gürcüstanın Böyük Britaniya və Şimali İrlandiya Birləşmiş Krallığında fövqəladə və səlahiyyətli səfiri vəzifəsinə İlia Darçiaşvili təyin edilib.

InterPress.ge xəbər verir ki, bu barədə Gürcüstan Xarici İşlər Nazirliyi məlumat yayıb.

Qurumun açıqlamasına əsasən, İlia Darçiaşvili eyni zamanda Beynəlxalq Dəniz Təşkilatında Gürcüstanın daimi nümayəndəsi vəzifəsini də icra edəcək.

Məlumata görə, Darçiaşvili 2022–2024-cü illərdə Gürcüstanın xarici işlər naziri olub. 2017–2021-ci illərdə isə Polşada Gürcüstanın fövqəladə və səlahiyyətli səfiri kimi fəaliyyət göstərib.

Bundan əvvəl o, Gürcüstan hökumət administrasiyasının rəhbəri, həmçinin regional inkişaf və infrastruktur nazirinin birinci müavini vəzifələrində çalışıb. Eyni zamanda, “Gürcüstan Bələdiyyə İnkişaf Fondu”nda icraçı direktor olub.

Qeyd olunur ki, İlia Darçiaşvili fövqəladə və səlahiyyətli səfir diplomatik rütbəsinə malikdir.