"Cərimələrin artırılması qəzaların sayını azaltmayacaq"

Gürcüstan Avtomobil Federasiyasının vitse-prezidenti Mevlud Meladze bildirib ki, yol hərəkəti qaydalarının pozulmasına görə cərimələrin artırılması qəzaların statistikasını azaltmayacaq.

InterPress.ge xəbər verir ki, o, bu barədə “BusinessPressNews”a müsahibəsində danışıb.

Meladzenin sözlərinə görə, yol qəzalarının əsas səbəbi maarifləndirmə və bilik çatışmazlığıdır və bu problemi yalnız cərimələrin artırılması ilə həll etmək mümkün deyil.

“Cərimələr müəyyən qədər çəkindirici rol oynaya bilər, lakin bu, problemin real həlli deyil. Əgər insanın biliyi yoxdursa, onu cərimələmək vəziyyəti dəyişməyəcək”, – deyə o qeyd edib.

O əlavə edib ki, mövcud yanaşma daha çox büdcənin doldurulmasına xidmət edir.

Meladzenin fikrincə, cərimələrin artırılması yalnız o halda effektiv ola bilər ki, əldə olunan vəsait birbaşa təhsilə və maarifləndirməyə yönəldilsin.

“Bu vəsaitin böyük hissəsi insanların maarifləndirilməsinə xərclənməlidir. Məsələn, bağça və məktəblər üçün dərs vəsaitləri hazırlanmalı, təlimlər keçirilməlidir. Çünki insan evdən çıxan kimi yol hərəkətinin iştirakçısına çevrilir”, – deyə o bildirib.

Qeyd edək ki, 2025-ci ildə Gürcüstanda baş verən yol-nəqliyyat hadisələri nəticəsində 469 nəfər həyatını itirib, 8191 nəfər isə xəsarət alıb.

Daxili İşlər Nazirliyinin məlumatına görə, qəzalar əsasən qarşı zolağa çıxma, manevr qaydalarının pozulması və sürət həddinin aşılması səbəbindən baş verir.

Bu səbəbdən, qurumun qərarına əsasən, 1 may tarixindən etibarən bəzi qayda pozuntularına görə cərimələr artırılacaq. Məsələn, manevr qaydalarının pozulmasına görə cərimə 100 lariyə qədər yüksəldiləcək, 15-40 km/saat sürət həddinin aşılmasına görə isə sanksiya 50-dən 100 lariyə qədər artırılacaq.