Kaxa Kaladze: “Kilsəyə qarşı hücumlar məqsədli şəkildə illərdir davam edir”

Tbilisi meri və “Gürcü arzusu”nun baş katibi Kaxa Kaladze kilsəyə qarşı aparılan kampaniyalarla bağlı açıqlama verib.

InterPress.ge xəbər verir ki, Kaladze bildirib, kilsəyə qarşı hücumlar yeni deyil və bu proses uzun illərdir davam edir.

“Bu hücumlar dünən başlamayıb. Son illərdə aydın şəkildə görürük ki, kilsənin nüfuzdan salınmasına yönəlmiş məqsədli kampaniya aparılırdı. Patriarxa qarşı necə hücumlar edildiyini hamımız yaxşı xatırlayırıq”, – deyə Kaladze qeyd edib.

Onun sözlərinə görə, cəmiyyət bu proseslərin haradan və kim tərəfindən idarə olunduğunu yaxşı bilir.

“Cəmiyyət çox yaxşı bilir ki, bu proseslər haradan gəlir, kimin sifarişi ilə həyata keçirilir və necə idarə olunur. Mən hesab edirəm ki, mövcud sualların hamısına artıq cavab verilib. Hamı görüb ki, kim kimdir”, – deyə o bildirib.

Kaladze əlavə edib ki, ölkə əhalisinin əksəriyyəti artıq siyasi qrupların kimə və nəyə xidmət etdiyini asanlıqla qiymətləndirə bilir.