Aİ xarici işlər nazirləri bazar ertəsi Gürcüstan məsələsini müzakirə edəcəklər

Avropa İttifaqının xarici işlər nazirləri bazar ertəsi keçiriləcək görüşdə Gürcüstanla bağlı məsələni müzakirə edəcəklər.

InterPress.ge xəbər verir ki, bu barədə məlumat Aİ Xarici İşlər Şurasının iclası öncəsi dərc olunan ilkin gündəlikdə yer alıb.

İlkin gündəliyə əsasən, 16 martda Brüsseldə keçiriləcək görüşdə nazirlər digər mövzularla yanaşı, Gürcüstanda baş verən siyasi prosesləri də müzakirə edəcəklər.

Gündəlikdə qeyd olunub: “Gürcüstanda baş verən siyasi hadisələr. Almaniya və Fransadan məlumat”.

Şuranın iclasında əsas müzakirə mövzuları arasında Rusiyanın Ukraynaya qarşı müharibəsi və Yaxın Şərqdəki vəziyyət də yer alır.