ABŞ Senatında Trampın İrana qarşı hərbi əməliyyatlar üçün Konqresin razılığını tələb edən qətnamə qəbul olunmayıb

ABŞ Senatında Prezident Donald Trampın gələcəkdə İrana qarşı hərbi əməliyyatlara başlamaq üçün Konqresin razılığını almasını nəzərdə tutan qətnamə qəbul edilməyib.

InterPress.ge-nin CNN-nə istinadən məlumatına görə, sənədi 47 senator dəstəkləyib, 53 senator isə əleyhinə səs verib.

Qətnamənin lehinə demokrat senatorlar və yalnız bir respublikaçı senator – Rend Pol səs verib. Onun qəbul edilməsinin qarşısını isə respublikaçı senatorlar və bir demokrat senator – Con Fetterman alıblar.

CNN qeyd edir ki, qətnamə qəbul olunsaydı belə, onun qarşısında çətin proses dayanırdı. Sənədin Nümayəndələr Palatasına göndərilməsi üçün Senatda tam düzəliş prosedurundan keçməsi, daha sonra isə ehtimal olunan prezident vetosunun aradan qaldırılması tələb olunacaqdı. Bunun üçün Konqres üzvlərinin üçdə iki səsi lazım idi.