Gürcüstan və Ermənistanın baş nazirlərinin həmsədrliyi ilə iqtisadi əməkdaşlıq üzrə hökumətlərarası komissiyanın iclası keçirilib
Gürcüstan və Ermənistanın baş nazirlərinin həmsədrliyi ilə iki ölkə arasında iqtisadi əməkdaşlıq üzrə hökumətlərarası komissiyanın iclası keçirilib.
InterPress.ge xəbər verir ki, bu barədə məlumatı Gürcüstan Hökumət Administrasiyası yayıb.
Qurumun bildirdiyinə görə, komissiyanın 15-ci iclasında Gürcüstanın Baş naziri İrakli Kobaxidze və Ermənistanın Baş naziri Nikol Paşinyan müxtəlif sahələrdə tərəfdaşlığın dərinləşdirilməsi istiqamətində mövcud müsbət dinamika və gələcək perspektivləri müzakirə ediblər.
Gürcüstanın Baş naziri Ermənistan Respublikası ilə strateji tərəfdaşlığı, artan əməkdaşlığı və regionda sabitliyin əhəmiyyətini xüsusi vurğulayıb.
“Ölkələrimiz arasında müxtəlif formatlarda əməkdaşlıq qurulub ki, bu da tərəfdaşlığımızın inkişafına müsbət təsir göstərir. Ermənistan sabit şəkildə Gürcüstanın əsas ticarət tərəfdaşları sırasında ilk onluqdadır. Ermənistandan Gürcüstana gələn ziyarətçilərin sayına gəldikdə isə, bu baxımdan Ermənistan ilk üçlükdə yer alır. Ticarət-iqtisadi əlaqələrlə yanaşı, bizi təhsil, mədəniyyət, xalqlar arasında münasibətlər və digər strateji istiqamətlərdə də sıx əməkdaşlıq birləşdirir. Bütün bunların fonunda əməkdaşlığın bütün sahələr üzrə daha da dərinləşdirilməsi üçün böyük potensial mövcuddur. Eyni zamanda regionda sabitliyin qorunması da çox vacibdir. Son dövrlərdə regionumuzda baş verən müsbət tendensiyalar bizi sevindirir. Sizinlə Azərbaycan arasında imzalanmış sülh sazişi çox önəmli hadisə oldu. Bu isə regionumuzun gücləndirilməsi və inkişafı üçün daha fəal çalışmaq baxımından yaxşı zəmin yaradır. Cənab Baş nazir, münasibətlərimizin inkişafına verdiyiniz şəxsi töhfəyə görə sizə təşəkkürümü bildirmək istəyirəm. Biz bunu yüksək qiymətləndiririk”, – deyə İrakli Kobaxidze bildirib.
Ermənistanın Baş naziri Nikol Paşinyan isə Gürcüstanın Ermənistan və Azərbaycan arasında sülh prosesinə davamlı dəstəyinə görə təşəkkür edib və iki ölkə arasında ticarət-iqtisadi əlaqələrin inkişafında müşahidə olunan müsbət dinamikanı vurğulayıb.
“Müstəqilliyin əldə olunduğu gündən etibarən Ermənistana Gürcüstandan qatarlar gəlir və ümid edirik ki, dəmir yolu əlaqələrinin nəticəsində ticarət daha da artacaq. Bu məsələdə sizin dəstəyiniz əvəzsizdir. Gürcüstanın dəstəyi ilə Ermənistan, Gürcüstan və Azərbaycan arasında üçtərəfli ticarət və münasibətlər daha da dərinləşib. Ermənistan və Azərbaycan arasında sülh, şübhəsiz ki, regionda vəziyyəti yaxşılaşdırır. Biz gələcəkdə də Gürcüstanın ərazi bütövlüyünü, suverenliyini və siyasi müstəqilliyini qeyd-şərtsiz dəstəkləyəcəyik. Xalqlarımız arasında tarixi münasibətlər çox yaxşı və müsbətdir. Bu, mühüm və dəyərli bir sərvətdir”, – deyə Nikol Paşinyan qeyd edib.
Gürcüstan–Ermənistan iqtisadi əməkdaşlıq üzrə hökumətlərarası komissiyanın iclasında hər iki ölkənin hökumət üzvləri iştirak ediblər.
