"Gürcü Arzusu"nun Siyasi Şurası: Böyük Britaniyanın sanksiyaları azad mediaya açıq hücumdur
"Gürcü Arzusu"nun Siyasi Şurası Böyük Britaniyanın iki aparıcı gürcü yayımçısına sanksiya tətbiq etməsi ilə bağlı bəyanat yayıb.
InterPress.ge xəbər verir ki, bəyanatda qeyd olunur ki, Böyük Britaniya tərəfindən iki aparıcı gürcü yayımçısına qarşı tətbiq edilən sanksiyalar azad mediaya açıq hücumun presedentsiz nümunəsidir. Siyasi Şuranın qiymətləndirməsinə görə, bu fakt bir tərəfdən faciəvi, digər tərəfdən isə sanksiyanın tətbiqi üçün göstərilən rəsmi səbəb baxımından komikdir.
Açıqlamada bildirilir ki, azad gürcü mediasına qarşı hücumun real motivi diskreditə olunmuş, "canlı-ölü" müxalifətə siyasi nəfəs vermək cəhdidir. Qeyd edilir ki, xarici qüvvələrin maraqları baxımından bu məsələ hələ də aktual olaraq qalır.
Siyasi Şuranın mövqeyinə görə, bir tərəfdə gürcü xalqının xidmətində olan və son iki il ərzində iki dəfə xalqın möhkəm etimadını qazanmış "Gürcü Arzusu", digər tərəfdə isə xarici qüvvələrin maraqlarına xidmət edən radikal müxalifət və xarici agentura dayanır.
Bəyanatda vurğulanır ki, heç bir sanksiya milli yayımçını həqiqəti söyləməkdən və cəmiyyəti məlumatlandırmaqdan çəkindirə bilməz. Sənəddə qeyd olunur ki, Gürcüstanda doğru sözün susdurulması mümkün deyil və həqiqət hər zaman öz yolunu tapacaq.
Açıqlamada radikal müxalifətin "İmedi" və "POSTV" telekanallarına qarşı tətbiq edilən sanksiyalara reaksiyası da tənqid olunur və bunun onların dəyər sistemini nümayiş etdirdiyi bildirilir.
Siyasi Şura bəyanatda ABŞ-da prezident Donald Trampın qərarı ilə USAID və NED kimi fondların bağlanmasına da toxunur və qeyd edir ki, ABŞ administrasiyası xarici ölkələrin daxili siyasi proseslərinə müdaxilə etməmək kursunu açıq şəkildə bəyan edib.
Sənəddə Avropa bürokratiyasının qeyri-rəsmi təsirlərdən azad olunmasının qısa və orta müddətli perspektivdə çətin olacağı qeyd edilir. ABŞ-la bağlı isə optimist gözləntilərin saxlanıldığı vurğulanır və Donald Trampın "dərin dövlətə" qarşı elan etdiyi mübarizənin real nəticələr verəcəyinə ümid ifadə olunur.
Bəyanatın sonunda qeyd edilir ki, son günlər baş verən hadisələr gürcü xalqının legitim dəstəyinə malik siyasi qüvvə ilə hakimiyyətə yalnız xarici maraqlara xidmət etmək üçün gəlmək istəyən qüvvələr arasındakı fərqi bir daha aydın şəkildə göstərib.
