DTX-nin Antiterror Mərkəzi terror xarakterli yalan məlumatlar yayan şəxsləri ifşa edib
Dövlət Təhlükəsizliyi Xidmətinin (DTX) Antiterror Mərkəzinin əməkdaşları tərəfindən Tbilisi, Kaxeti və Kvemo Kartli regionlarında eyni vaxtda keçirilən əməliyyatlar nəticəsində terror xarakterli yalan məlumatlar yayan şəxslər müəyyən edilib.
InterPress.ge xəbər verir ki, bu barədə DTX rəisinin birinci müavini Laşa Mağradze brifinqdə məlumat verib.
Onun sözlərinə görə, terrorizm barədə yalan məlumat yaymaq faktı üzrə 2006-cı il təvəllüdlü şəxs saxlanılıb. Daha bir neçə şəxs barəsində istintaq hərəkətləri davam etdirilir.
“Son dövrlərdə ölkə üzrə yalan məlumatların yayılması halları artıb. Dövlət qurumlarının elektron poçt ünvanlarına müxtəlif şəhərlərdə ictimai yerlərdə, məktəblərdə və təşkilatlarda partlayış və ya bomba olması barədə çoxsaylı anonim təhdid mesajları daxil olub. Bu faktlarla bağlı DTX-nin Antiterror Mərkəzinin əməkdaşları tərəfindən həyata keçirilən tədbirlər nəticəsində terror məzmunlu yalan məlumatlar yayan şəxslər müəyyən edilib. 2006-cı il təvəllüdlü saxlanılan şəxs törətdiyi əməli etiraf edir. Digər şəxslərin elektron cihazları araşdırılır və kifayət qədər əsas olduqda onlar barəsində də hüquqi tədbirlər görüləcək”, – deyə Mağradze bildirib.
Məlumata görə, təhdid mesajlarının müəllifləri əsasən virtual şəbəkələrdən, IP ünvanlarını gizlətmək üçün müasir texnologiyalardan və səs dəyişdirən proqramlardan istifadə ediblər. Axtarış zamanı mobil telefonlar, kompüterlər, yaddaş kartları və digər elektron daşıyıcılar götürülüb.
DTX rəsmisi vurğulayıb ki, daxil olan bütün məlumatlara mənşəyindən və məzmunundan asılı olmayaraq təhlükəsizlik baxımından müvafiq hüquqi reaksiya verilib və bu prosesdə Daxili İşlər Nazirliyinin bölmələri də iştirak edib. Heç bir halda təhdidlərin real olduğu təsdiqlənməyib.
Faktla bağlı istintaq aparılır. Qanunvericiliyə əsasən, terrorizm barədə yalan məlumat yaymaq 3 ildən 6 ilədək azadlıqdan məhrumetmə cəzasını nəzərdə tutur.
“DTX artıq bu cür cinayətlərin aşkar edilməsi və identifikasiyası üçün müasir texniki imkanlara malikdir. Buna görə də xəbərdarlıq edirik ki, hər bir qanunsuz addım ciddi hüquqi reaksiya ilə nəticələnəcək”, – deyə Laşa Mağradze əlavə edib.
