İrakli Kobaxidze: Dörd il gizli şəkildə sanksiyalar tələb edirdilər, indi açıq danışırlar – bu, ikili standartın göstəricisidir
Gürcüstanın Baş naziri İrakli Kobaxidze Böyük Britaniyanın Gürcüstandakı səfirinin bəyanatlarına münasibət bildirib.
InterPress.ge xəbər verir ki, baş nazirin sözlərinə görə, son dörd il ərzində Gürcüstana qarşı sanksiyaların tətbiqi tələbi qapalı şəkildə səsləndirilirdi, lakin bu barədə açıq danışılmırdı.
“Dörd il ərzində kulis arxasında bizdən sanksiyalar tətbiq etməyi tələb edirdilər, amma bunu ictimai şəkildə deməkdən çəkinirdilər. İndi isə bu barədə açıq danışmağa qərar veriblər və bu, çox yaxşıdır”, – deyə Kobaxidze bildirib.
Onun sözlərinə görə, əvvəlcə Avropa Parlamentinin qətnaməsində Gürcüstana açıq şəkildə sanksiyalara qoşulmaq çağırışı edilib, indi isə səfirlərin bəyanatları verilir.
“Biz cəmiyyətə nə deyirdiksə və bəzi şəxslər bunun baş vermədiyini iddia edirdilərsə, indi artıq açıq şəkildə danışırlar. Əvvəl Avropa Parlamentinin qətnaməsi oldu, indi isə səfirlərin açıqlamaları var. Elə ölkələr var ki, onları qərbyönlü və anti-Rusiya kimi təqdim edirlər, lakin onlar heç bir sanksiya tətbiq etməyiblər və onlardan bunu tələb edən də olmayıb. Bu, açıq-aydın ikili standartdır və ölkəmizə qarşı konkret marağın olduğunu göstərir”, – deyə baş nazir qeyd edib.
Kobaxidze Ukrayna ilə bağlı BMT qətnaməsinə də toxunaraq bildirib ki, Gürcüstan bu sənədi dəstəkləyib.
“Biz açıq şəkildə dəstəkləyici mövqe tutduq və müvafiq qətnaməyə səs verdik. Halbuki bəzi ölkələr həmin qətnamənin dəstəklənməsindən imtina etdilər, amma yenə də qərbyönlü və anti-Rusiya kimi təqdim olunurlar. Bu ikili standartları hamı görür. Son dörd ildə biz Ukraynanın suverenliyi və ərazi bütövlüyünü dəstəkləyən, Rusiyanın hərbi təcavüzünü pisləyən minə yaxın müxtəlif sənədə – qətnamə və bəyanatlara qoşulmuşuq”, – deyə o bildirib.
Qeyd edək ki, Böyük Britaniyanın Gürcüstandakı səfiri Qaret Uord bildirib ki, heç kim Gürcüstandan “ikinci cəbhə” açmağı tələb etmir və bu iddialar dezinformasiyadır.
Onun sözlərinə görə, Gürcüstan Rusiyanın Ukraynaya təcavüzü fonunda mühüm rola malikdir və Avropa sanksiyalarına qoşulmaqla öz töhfəsini verə bilər.
“Ukraynaya qarşı Rusiya işğalı Gürcüstan üçün çox aktual və mühüm məsələdir. Gürcüstan ərazisinin 20%-i Rusiya tərəfindən işğal olunub və rus qoşunları hələ də ölkə ərazisindədir. Heç kim Gürcüstandan ikinci cəbhə açmağı tələb etmir – bu, dezinformasiyadır. Biz deyirik ki, Gürcüstan Avropa sanksiyalarına qoşulmaqla, Rusiyanın hərbi materiallara çıxışını və neft-qaz gəlirlərini məhdudlaşdırmaqla öz rolunu oynaya bilər”, – deyə Britaniya səfiri bildirib.
