İrakli Kobaxidze: Peşə təhsilinin inkişafına xüsusi diqqət yetirilməlidir

"Peşə təhsilinin inkişafına xüsusi diqqət ayrılmalıdır."

InterPress.ge xəbər verir ki, bu barədə Gürcüstanın Baş naziri İrakli Kobaxidze əmək bazarının tədqiqat nəticələrinin təqdimatında çıxışı zamanı bildirib.

Hökumət başçısının sözlərinə görə, əmək bazarının təhlili bir mühüm problemi üzə çıxarıb – hazırda işləyənlərin yalnız 60 faizinin tutduğu vəzifə üzrə ali təhsil diplomuna ehtiyacı var.

“Əslində bu insanların 40 faizi peşə təhsilinə ehtiyac duyur və müvafiq istiqamətdə məşğuldur. Bildiyiniz kimi, illər boyu peşə təhsili sahəsində ciddi problemlər mövcud olub. Apardığımız islahatın əsas məqsədlərindən biri ölkədə peşə təhsilinin təkmilləşdirilməsi və keyfiyyətin yüksəldilməsidir”, – deyə Baş nazir vurğulayıb.

İrakli Kobaxidze qeyd edib ki, hökumət tədqiqatın detalları ilə bağlı müzakirələr aparmağa və sualları cavablandırmağa hazırdır.

Onun sözlərinə görə, bu təhlilin aparılması zəruri idi ki, abituriyentlərin, gənclərin və tələbələrin maraqları maksimum dərəcədə qorunsun və onların peşə seçimində düzgün istiqamət müəyyənləşdirilsin.