Avtomobillərlə bağlı qadağa bu avtomobillərə şamil edilməyəcək

Avtomobillərin idxalı və ilkin, eləcə də müvəqqəti qeydiyyatı ilə bağlı tətbiq edilən yeni qaydalar elektrik avtomobillərinə şamil olunmur.

InterPress.ge xəbər verir ki, bu barədə Ətraf Mühitin Mühafizəsi və Təbii Sərvətlər Nazirliyi məlumat verib.

Hökumət qərarına əsasən, 2026-cı il 1 aprel tarixindən etibarən Gürcüstana 6 ildən artıq yaşı olan M1 kateqoriyalı minik avtomobillərinin həm ilkin, həm də müvəqqəti qeydiyyatı qadağan ediləcək.

M1 kateqoriyasına tam kütləsi 5 tondan çox olmayan, sürücü yeri istisna olmaqla maksimum 8 sərnişin yeri olan və sərnişinlərin, eləcə də onların baqajının daşınması üçün nəzərdə tutulmuş avtomobillər daxildir. Konkret nəqliyyat vasitəsinin M1 kateqoriyasına aid olub-olmadığını müəyyən etmək üçün Daxili İşlər Nazirliyinin Xidmət Agentliyinə müraciət etmək mümkündür.

Məhdudiyyət elektrik avtomobillərinə şamil edilmir və onların buraxılış ilindən asılı olmayaraq qeydiyyatı mümkündür. Qadağa, həmçinin idxal edilən, lakin Gürcüstanda qeydiyyata alınmayan avtomobillərə, eləcə də reeksport, tranzit və ixrac əməliyyatlarına aid edilmir.

Yeni qaydalar artıq Gürcüstanda qeydiyyatda olan avtomobillərə və 2026-cı il 1 aprelədək idxal edilmiş nəqliyyat vasitələrinə şamil olunmur.

Bundan başqa, 1 aprel 2026-cı ilədək Gürcüstan istiqamətində daşınmasına başlanmış avtomobillər də istisna təşkil edir. Dəniz daşımaları zamanı konosamentdə və ya daşıyıcı tərəfindən verilmiş sənəddə avtomobilin 1 aprel 2026-cı ilədək göndərən limanda qəbul edildiyi və ya gəmiyə/ konteynerə yükləndiyi göstərilməlidir. Avtomobil, dəmir yolu və ya öz hərəkəti ilə gətirilən nəqliyyat vasitələri isə ən gec 1 iyul 2026-cı ilədək Gürcüstan dövlət sərhədini keçməli və daşınmanın 1 aprel 2026-cı ilədək başladığını təsdiqləyən sənədlər təqdim edilməlidir.

Eyni zamanda, qüvvədə qalır ki, avtomobil “Euro 5b” standartına uyğun olmalıdır və bu tələblə bağlı əlavə istisna nəzərdə tutulmur.