İrakli Kobaxidze: Xarici tələbələrin Gürcüstan iqtisadiyyatına töhfəsi 1,2 milyard lari təşkil edir

Gürcüstanda təhsil alan xarici tələbələrin ölkə iqtisadiyyatına töhfəsi 1 milyard 200 milyon lariyə çatır. Bu isə o deməkdir ki, onların xərcləri hesabına dövlət büdcəsinə hər il təxminən 300 milyon lari daxil olur.

InterPress.ge xəbər verir ki, bu barədə baş nazir İrakli Kobaxidze bildirib.

Hökumət başçısının sözlərinə görə, hazırda Gürcüstanda 37 min xarici tələbə təhsil alır və onların əksəriyyəti Hindistan vətəndaşlarıdır. Tələbələrin 7 faizi İordaniyadan, 6 faizi İsraildən, 5 faizi Sudandan, 3 faizi isə Pakistan, Böyük Britaniya və Misirdəndir.

Baş nazir qeyd edib ki, bir xarici tələbə təhsil haqqı kimi ildə orta hesabla 15 500 lari ödəyir və ölkə daxilində əlavə olaraq 16 300 lari xərcləyir. Ümumilikdə isə onların fəaliyyəti nəticəsində Gürcüstanda 10 mindən çox iş yeri yaradılıb.

Kobaxidzenin sözlərinə görə, xarici tələbələr üçün proqramların ləğvi Gürcüstan iqtisadiyyatı, dövlət büdcəsi və məşğulluq göstəriciləri üçün ciddi itkilərə səbəb ola bilər.

O əlavə edib ki, tələbələr diplom əldə etdikdən sonra ölkəni tərk edirlər və buna görə də Gürcüstanın demoqrafik vəziyyəti üçün heç bir risk yaratmırlar.