Tbilisidə İran İslam İnqilabının 47-ci ildönümü qeyd olunub
Tbilisidə 11 fevral tarixində İran İslam İnqilabının qələbəsinin 47-ci ildönümünə həsr olunmuş tədbir keçirilib. Məlumatı İranda Gürcüstandakı səfirlik yayıb.
InterPress.ge xəbər verir ki, tədbirdə Gürcüstan xarici işlər nazirinin müavini Laşa Darsaliya, müxtəlif ölkələrin səfirləri və diplomatik nümayəndəliklərin rəhbərləri, hərbi attaşelər, eləcə də mədəniyyət, iqtisadiyyat və media sahələrinin tanınmış nümayəndələri və Gürcüstanda yaşayan iranlılar da daxil olmaqla, 500-ə yaxın qonaq iştirak edib.
Belə ki, tədbir iki ölkənin dövlət himnlərinin səsləndirilməsi ilə başlayıb. Daha sonra İran İslam İnqilabının nailiyyətlərini, eləcə də müxtəlif sahələrdə mövcud imkan və potensialı əks etdirən videoçarx nümayiş olunub.
Tədbirdə İran İslam Respublikasının Gürcüstandakı fövqəladə və səlahiyyətli səfiri Seyid Əli Mocani çıxış edərək, son 47 il ərzində İranın müxtəlif sahələrdə əldə etdiyi uğurlardan danışıb. O, İranın regional və beynəlxalq səviyyədə mövqeyini möhkəmləndirmək niyyətində olduğunu vurğulayıb.
Səfir qeyd edib ki, İran İslam Respublikası çağırışların aradan qaldırılmasında diplomatiya və danışıqlara xüsusi önəm verir. Bununla yanaşı, İranın düşmənlər tərəfindən edilən hər hansı təhdidə qarşı tam hazır olduğunu bildirib.
Gürcüstan xarici işlər nazirinin müavini Laşa Darsaliya isə İran xalqını və hakimiyyətini İslam İnqilabının ildönümü münasibətilə təbrik edib. O qeyd edib ki, İran İslam Respublikası Gürcüstanın müstəqilliyini rəsmi şəkildə tanıyan ilk ölkələrdən biri olub.
Nazir müavini vurğulayıb ki, Gürcüstan hökuməti regionda müsbət gündəliyin irəlilədilməsi məqsədilə İranla əməkdaşlığı davam etdirməyə hazırdır.
Tədbir çərçivəsində 1918-ci ildə İranın Gürcüstanın müstəqilliyini rəsmi şəkildə tanıyan ilk dövlət olduğunu təsdiqləyən unikal sənəd də nümayiş etdirilib.
Eyni zamanda, tədbir zamanı tibb və farmasevtika sahələrinə dair sərgi təşkil olunub, eləcə də incəsənət və əl işləri nümunələri təqdim edilib.
