Liz Trass: BBC dövlət bürokratik aparatının bir qoluna çevrilib

Böyük Britaniyanın sabiq baş naziri Liz Truss şəxsi podkastında jurnalist Will Kingston ilə birlikdə Qərb mediasında, xüsusilə Böyük Britaniyada medianın qərəzliliyi və “vouk” ideologiyasının təsiri mövzusunda danışıb.

Kinqstonun sözlərinə görə, bu gün bir çox jurnalist peşəyə həqiqəti axtarmaq üçün deyil, siyasi məqsədlərlə aktivist kimi daxil olur. O, bunun əsas səbəbləri kimi aşağı əməkhaqqını, “aktivist” mövzuların artan populyarlığını və medianın milyarderlər tərəfindən sahiblənilməsini göstərib.

Məhz bu kontekstdə Trass BBC haqqında da fikirlərini bölüşərək Böyük Britaniyada medianın vəziyyətinin daha ağır olduğunu vurğulayıb. Onun sözlərinə görə, media artıq neytral informasiya ötürücüsü rolunu yerinə yetirmir, əksinə ideoloji və siyasi alətə çevrilib; bu prosesə həm dövlət strukturları, həm də media tənzimləyiciləri dəstək verir.

“Böyük Britaniyada vəziyyət daha ağırdır, çünki dövlət tərəfindən maliyyələşdirilən BBC faktiki olaraq dövlət bürokratik aparatının bir qoluna çevrilib. Burada ‘vouk’ mədəniyyəti, transgender ideologiyası, İsrailə, ABŞ-yə və Donald Trumpa qarşı mənfi münasibətlər möhkəmlənib. Bildiyiniz kimi, Prezident Tramp genişmiqyaslı qərəzlilik səbəbilə onlara qarşı məhkəməyə də müraciət edib”, – deyə Trass qeyd edib.