Mixeil Saakaşvili: GTU İvanişvilinin məhv etdiyi ilk texniki universitet deyil

"Gürcüstan Texniki Universiteti (GTU) Bidzina İvanişvilinin dayandırdığı ilk texniki universitet layihəsi deyil."

InterPress.ge xəbər verir ki, bu barədə Gürcüstanın üçüncü prezidenti Mixeil Saakaşvili sosial şəbəkə hesabında paylaşım edərək bildirib.

Saakaşvilinin sözlərinə görə, 2010-cu ildə o, ABŞ Prezident Administrasiyasından təhsil layihələri üçün 150 milyon dollar vəsait ayrılmasına nail olub və həmin vəsaitin Batumidə Amerika texnoloji universitetinin yaradılmasına yönəldilməsini tələb edib. Onun sözlərinə görə, Gürcüstan tərəfi də layihəyə eyni məbləğdə – 150 milyon dollar yatırım etməyi planlaşdırıb.

Saakaşvili qeyd edib ki, mərhum Kaxa Bendukidze ilə birlikdə dünyanın aparıcı texnoloji ali məktəblərindən biri olan Georgia Institute of Technology (Georgia Tech) ilə tərəfdaşlıq qurulub. O bildirib ki, amerikalı tərəf ilkin mərhələdə bu layihənin maliyyələşdirilməsinə tərəddüdlə yanaşıb, çünki bu, ABŞ universitetlərinə rəqib olacaq ali məktəbin başqa ölkədə yaradılması demək idi.

Keçmiş prezidentin sözlərinə görə, Batumidə layihə çərçivəsində ilk, müasir və gözoxşayan bina inşa edilib və daha beş binanın tikintisi planlaşdırılıb. Lakin Bidzina İvanişvili baş nazir olduqdan sonra verdiyi ilk qərarlardan biri ilə layihəni dayandırıb və nəticədə Amerika tərəfindən ayrılmış vəsait səmərəsiz şəkildə xərclənib.

Saakaşvili bildirib ki, Batumidə inşa edilmiş, Qafqazın ən hündür binasında sonradan universitet əvəzinə yaşayış mənzilləri və kazino fəaliyyətə başlayıb. Onun sözlərinə görə, layihənin bağlanmasından sonra bu Amerika texnoloji universiteti ideyasına faktiki olaraq sahib çıxan olmayıb və bir çoxları bunu onun şəxsi təşəbbüsü kimi dəyərləndirib.