Gürcüstanda sahibkar hüquqi şəxslərin siyasi fəaliyyəti inzibati məsuliyyət yaradacaq
Hakimiyyətə, dövlət qurumlarına və ya cəmiyyətin hər hansı bir hissəsinə təsir göstərmək məqsədilə, Gürcüstanın daxili və ya xarici siyasətinin formalaşdırılmasına, həyata keçirilməsinə və ya dəyişdirilməsinə yönələn fəaliyyət sahibkar hüquqi şəxs üçün siyasi fəaliyyət hesab ediləcək və bu hal inzibati qaydada cərimə ilə nəticələnəcək.
InterPress.ge xəbər verir ki, bu məsuliyyət “İnzibati Xətalar Məcəlləsi”nə edilməsi nəzərdə tutulan dəyişikliklər layihəsi çərçivəsində tətbiq olunur. Layihəyə əsasən, Məcəlləyə “Sahibkar hüquqi şəxsin siyasi fəaliyyəti” adlı yeni maddə əlavə edilir. Həmin maddəyə görə, sahibkar hüquqi şəxsin əsas kommersiya fəaliyyəti ilə əlaqəsi olmayan siyasi fəaliyyəti açıq şəkildə həyata keçirməsi 20 min lari məbləğində cərimə ilə cəzalandırılacaq. Eyni hərəkətin təkrar törədilməsi halında isə cərimə 40 min lari təşkil edəcək.
Layihəyə əsasən, inzibati xətalar üzrə işlərə baxılması və inzibati tənbeh tədbirlərinin tətbiqi səlahiyyəti Dövlət Audit Xidmətinə veriləcək.
Qanunvericilik dəyişiklikləri paketi parlamentə “Gürcü Arzusu” fraksiyası tərəfindən təqdim olunub. Hakim çoxluğun açıqlamasına görə, bu tənzimləmə sahibkar hüquqi şəxslərin iqtisadi fəaliyyət göstərmək və ya birbaşa öz fəaliyyət sahəsinə aid məsələlərlə bağlı mövqe bildirmək azadlığını məhdudlaşdırmır. “Gürcü Arzusu”nun bildirdiyinə görə, məhdudiyyət yalnız funksional olaraq sahibkarlıq məqsədləri ilə əlaqəsi olmayan və faktiki olaraq siyasi proseslərin maliyyələşdirilməsinə xidmət edən siyasi fəaliyyətə şamil olunur.
Partiyanın açıqlamasında qeyd olunur ki, Gürcüstan Konstitusiyasının 3-cü maddəsinin 4-cü bəndinə əsasən, xalqın siyasi iradəsinin formalaşdırılması və həyata keçirilməsində siyasi partiyalar iştirak edir. “Vətəndaşların siyasi birlikləri haqqında” qanunun 26-cı maddəsinin birinci hissəsinin “b” yarımbəndinə görə isə siyasi partiyaların Gürcüstanda və ya onun hüdudlarından kənarda qeydiyyatdan keçmiş hüquqi şəxslərdən ianə qəbul etməsi qadağandır.
Bununla bağlı vurğulanır ki, dəyişikliklərin məqsədi sahibkar hüquqi şəxslərin iqtisadi fəaliyyət hüdudlarından kənarda siyasi proseslərə qeyri-mütənasib təsirinin qarşısının alınması, siyasi proseslərin ədalətliliyinin, şəffaflığının və bərabər iştirakın təmin edilməsidir. Qeyd edilir ki, sahibkar hüquqi şəxslər əhəmiyyətli maliyyə, təşkilati və kommunikasiya resurslarına malik olduqları üçün, bu resursların siyasi məqsədlərlə istifadəsi siyasi qərarların ictimai maraqlardan deyil, şəxsi iqtisadi maraqlardan qaynaqlanması riskini yarada bilər.
“Gürcü Arzusu”nun bəyanatına görə, qanun layihəsində nəzərdə tutulan dəyişikliklər sahibkar hüquqi şəxslərin əsas fəaliyyətindən kənara çıxan və onların peşəkar və ya sahə maraqlarının müdafiəsini aşan siyasi fəaliyyətlərə görə məsuliyyətin müəyyənləşdirilməsini nəzərdə tutur.
