Gürcüstanda qrantlar və siyasi fəaliyyətlə bağlı yeni qanunvericilik paketi parlamentə təqdim olunub

Gürcüstan parlamentində qrantlar və siyasi fəaliyyətlə bağlı yeni qanunvericilik dəyişiklikləri paketi təşəbbüs edilib və müzakirə üçün aidiyyəti komitələrə göndərilib. 

InterPress.ge xəbər verir ki, qanunvericilik təşəbbüsünün müəllifi hakim Gürcü Arzusu fraksiyasıdır və dəyişikliklər ümumilikdə yeddi qanunu əhatə edir.

Dəyişiklik paketinin mahiyyəti və əsas müddəaları yanvarın 28-də keçirilən çoxluğun iclasından sonra fraksiyanın sədri İrakli Kirxalia tərəfindən ictimaiyyətə təqdim olunub.

“Qrantlar haqqında” qanuna edilən dəyişikliklə qrant anlayışı dəqiqləşdirilir və genişləndirilir. Yeni tərifə əsasən, istənilən fiziki və ya hüquqi şəxs tərəfindən digər şəxsə pul və ya natura formasında verilən və Gürcüstan hakimiyyətinə, dövlət qurumlarına və ya cəmiyyətin hər hansı hissəsinə təsir göstərmək məqsədi daşıyan və ya daşıya biləcək vəsaitlər də qrant hesab olunacaq.

Bu cür qrantların qəbulu yalnız Gürcüstan hökumətinin əvvəlcədən verdiyi icazə əsasında mümkün olacaq.

Qanunvericilik paketində Gürcüstanla bağlı aktiv fəaliyyət göstərən xarici hüquqi şəxslər üçün ayrıca tənzimləmə nəzərdə tutulur. Belə təşkilatlar qrant almaq üçün mütləq hökumətin əvvəlcədən razılığını almalıdır. Əks halda, bu hal cinayət məsuliyyəti yarada bilər.

Eyni zamanda, xarici qurumun Gürcüstandakı filialı və ya nümayəndəliyi, hətta ana təşkilatdan maliyyə alarkən də, hökumətin razılığını əldə etməlidir. Razılıq olmadan qrant qəbul edildikdə, qanunsuz alınmış məbləğin ikiqatı həcmində cərimə tətbiq ediləcək.

Dəyişikliklər Gürcüstan Cinayət Məcəlləsinə də şamil olunur. Qrantlarla bağlı müəyyən edilmiş qaydaların pozulması aşağıdakı cəzalarla nəticələnə bilər:

• cərimə,

• 300–500 saat ictimai faydalı iş,

• 6 ilədək azadlıqdan məhrumetmə.

Bundan əlavə, siyasi məqsədlərlə pulun yuyulması ağırlaşdırıcı hal kimi müəyyən edilir və bu halda 9 ildən 12 ilədək həbs cəzası nəzərdə tutulur.

Siyasi partiya rəhbər şəxslərinin xarici maliyyə qəbul etməsi də cinayət məsuliyyəti yaradır. Bu pozuntuya görə də cərimə, ictimai işlər və ya 6 ilədək həbs cəzası tətbiq oluna bilər.

Bununla yanaşı, xarici lobbiçilik fəaliyyəti də cinayət hesab ediləcək. Xarici dövlət və ya qurumun maraqları naminə Gürcüstanla bağlı siyasi fəaliyyətə görə maddi və ya digər üstünlüklərin verilməsi 6 ilədək azadlıqdan məhrumetmə ilə cəzalandırıla bilər.

“Vətəndaşların siyasi birlikləri haqqında” qanuna əsasən, gəlirinin 20%-dən çoxunu xarici mənbədən alan təşkilatda çalışan şəxslərin 8 il müddətinə siyasi partiyalara üzv olması qadağan ediləcək. Bu prosesə nəzarəti Dövlət Audit Xidməti həyata keçirəcək.

Dəyişikliklər sahibkarlıq subyektlərinin siyasi fəaliyyətinə də aiddir. Əgər müəssisə öz əsas iqtisadi fəaliyyəti ilə əlaqəsi olmayan ictimai-siyasi aktivlik göstərərsə:

• ilk halda 20 000 lari,

• təkrar hallarda isə 40 000 lari məbləğində cərimə olunacaq.

Qeyd edək ki, təqdim olunan qanunvericilik paketi hazırda parlament komitələrində müzakirə mərhələsindədir.