Levan Xabeişvili məhkəmədə: “Bu iş başdan-ayağa siyasi sifarişdir”

“Milli Hərəkat” partiyasının Siyasi Şurasının sədri Levan Xabeişvili ona tətbiq edilən məhdudiyyətlərə etiraz edib.

InterPress.ge xəbər verir ki, o, bu barədə bugünkü məhkəmə iclasında çıxışı zamanı bildirib.

Xabeişvilinin sözlərinə görə, onun bütün hüquqları məhdudlaşdırılıb və faktiki olaraq cəza çəkən şəxs kimi davranılır.

“Hamı şeyim məhdudlaşdırılıb və qoy məhkəmə açıq desin ki, mən ölü hesab olunuram. Telefon yoxdur, övladlarım yoxdur. Başa düşə bilmirəm, mən qatilyam? Hər dəfə məhkəməyə sakit şəkildə gəlirəm, amma prokuror hər dəfə məni təxribatla üz-üzə qoyur, bəzən sözümü dinləmək belə istəmir. Onun istədiyi tək şey mənim həbsdə qalmağımdır”, – deyə Xabeişvili bildirib.

Xabeişvili bu sözləri prokuror Beka Xunaşvilinin replikasına cavab olaraq səsləndirib. Belə ki, saxlanılan siyasətçi məhkəmədən ona söz verilməsini xahiş etdikdən sonra prokuror “Siyasi bəyanatlara qulaq asmalıyıq?” ifadəsini işlədib.

Xabeişvilinin fikrincə, bu yanaşma ilə prokuror məhkəmənin səlahiyyətlərinə müdaxilə edir.

“Ovladlarımın niyə həbsxanada mənimlə görüşünə icazə vermirsiniz? Prokuror niyə məhkəmənin səlahiyyətlərinə qarışır? Hər şeyim məhdudlaşdırılıb. Mən siyasətçiyəm və siyasi bəyanatlara görə saxlanılmışam. Cinayətkar kimi bütün hüquqlarımı əlimdən almısınız. Söz deməyə də icazə vermirsiniz. Mən insan deyiləm?

Mənim işim başdan-ayağa siyasi bəyanatlarla bağlıdır. Heç kim gizli şəkildə nəsə etdiyimi iddia etmir, yalnız siyasi çıxışlarımı əsas gətirirlər. Altı aydır həbsdəyəm, amma guya mənim sözlərimdən təhqir olunduğunu deyən şahidləri hələ də məhkəməyə gətirməyiblər. Gəlsinlər və desinlər ki, nədən təhqir olunublar.

Sağlamlığımla bağlı ciddi problemlərim var, az qala əlil vəziyyətinə düşmüşəm. Prokuror isə emosiyalarımı belə qadağan etməyə çalışır. Mənim də bu işə qiymət vermək hüququm var. Mən ədalətsiz yerə buradayam və bunu deməyim onları qəzəbləndirir.

Mənə Gürcüstanın adından ittiham irəli sürülür, ona görə də xalq bilməlidir ki, bu qədər vaxt ərzində bir dənə də real şahid təqdim olunmayıb”, – deyə Xabeişvili bildirib.

Öz növbəsində, prokuror Xabeişvilinin çıxışı zamanı belə reaksiya verib: “Mən məhz bunun qarşısını almaq istəyirdim, burası teatr deyil”.