İranın Gürcüstandakı səfıri İrandakı etirazlar barədə danışdı: "Radikalizm dövlətin reaksiyasını qaçılmaz edir"
"Yalnız bir gün ərzində Tehranda 100 nəfər həyatını itirib."
InterPress.ge xəbər verir ki, bu barədə İran İslam Respublikasının Gürcüstandakı səfiri Seyyed Əli Mocani səfirlikdə keçirilən mətbuat konfransında İranda baş verən son hadisələrlə bağlı suala cavab verərkən bildirib.
Səfirin sözlərinə görə, ədalətli etirazlar tamamilə başadüşülən və qəbul ediləndir, lakin etirazlar radikal və destruktiv forma aldıqda, dövlətin ictimai asayişi qorumaq üçün buna reaksiya verməsi qaçılmazdır. O qeyd edib ki, ilkin mərhələdə dinc xarakter daşıyan etirazlar xarici aktorların bəyanatlarından sonra radikallaşıb.
Diplomat paralel olaraq Gürcüstanda son bir il ərzində keçirilən etiraz aksiyalarını xatırladaraq vurğulayıb ki, Tbilisi küçələrində aksiyalar dinc şəkildə keçdiyi dövrdə etirazçılara qarşı güc tətbiq olunmayıb.
Seyyed Əli Mocaninin sözlərinə görə, İran Konstitusiyasının 27-ci maddəsinə əsasən, bütün vətəndaşlar silahdan istifadə edilməməsi və ictimai asayişə təhlükə yaradılmaması şərti ilə etiraz və sərbəst toplaşmaq hüququna malikdirlər. Onun bildirdiyinə görə, İran hökumətinin korrupsiyaya qarşı mübarizəni gücləndirmək məqsədilə valyutanın preferensial məzənnəsini ləğv etməsi cəmiyyətdə narazılığa səbəb olub. Bu səbəbdən həmkarlar ittifaqları və sindikatlar aksiyalar və tətil çağırışları ediblər. Lakin tətil elanlarına baxmayaraq, sindikat və həmkarlar ittifaqlarının rəhbərləri hakimiyyət nümayəndələri ilə daimi dialoqda olublar və bu dialoqlardan biri İran prezidenti ilə də baş tutub.
Səfir qeyd edib ki, etirazlar səkkizinci günədək sivil şəkildə davam edib, lakin müxtəlif ölkələr və xarici aktorlar mövqelərini açıqladıqdan sonra aksiyalar radikal xarakter alıb. Onun sözlərinə görə, bu mərhələdə etirazlar çərçivəsində həm şəxsi, həm də dövlət əmlakının yandırılması kimi destruktiv hərəkətlər baş verib ki, bu da dövlətin asayişi qorumaq üçün müdaxiləsini zəruri edib.
Diplomat bildirib ki, son dövrdə İranda müşahidə olunan etiraz aksiyaları çağırışları baxımından əvvəlkilərdən tamamilə fərqlənib və bu çağırışların əksəriyyəti xarici ölkələrdən səsləndirilib. Onun sözlərinə görə, əsas çağırışlar dövlət binalarına və qurumlara hücumlar, polisə müqavimət, itaətsizlik, xilasedicilərin işinə mane olmaq, müxtəlif obyektlərə hücum və yanğın törətmək olub. Səfir əlavə edib ki, Gürcüstanda da bir ildən artıqdır etiraz aksiyaları keçirilir və bu aksiyalar dinc şəkildə baş verdikdə, etirazçılara qarşı heç bir güc tətbiq olunmur.
Seyyed Əli Mocani bildirib ki, İranda etirazların doqquzuncu və onuncu günlərində vəziyyət kəskin şəkildə dəyişib. Onun sözlərinə görə, bu günlərdə etirazçılar arasında üzləri örtülü, silahlı şəxslər peyda olub və onlar insanlara birbaşa atəş açıblar. Həmin şəxslər həm dövlət, həm də özəl obyektlərə hücum ediblər, etirazçılara qarşı odlu və soyuq silahlardan istifadə ediblər. Diplomat vurğulayıb ki, bu şəxslərin kimliyi hələ də müəyyən edilməyib və etirazları yönləndirən xarici qüvvələr tərəfindən vəziyyətin eskalasiyası və etirazların radikallaşdırılması ilə bağlı çağırışlar səsləndirilib. Onun sözlərinə görə, etirazların onuncu günü xüsusilə ağır olub və proses pik həddə çatıb.
Səfir qeyd edib ki, istənilən məsuliyyətli hökumət öz vətəndaşlarının müdafiəsində maraqlıdır və heç vaxt onların zərər görməsinə yönəlmiş addım atmaz. O bildirib ki, hakimiyyət təşkilatlanmış xaosla üzləşdikdə, artıq seçim ictimai asayişin bərpası ilə humanist davranış arasında edilir.
Diplomatın sözlərinə görə, İranda baş verən hadisələrlə əlaqədar ölkədə üç gün matəm elan edilib və bu, xarici müdaxilələr və sosial şəbəkələrdə aparılan anti-İran kampaniyası fonunda baş vermiş əsl faciə olub. O əlavə edib ki, belə hallarda fövqəladə vəziyyətin elan olunması qaçılmazdır. Son dövrdə İranda internetin və telefon rabitəsinin müvəqqəti dayandırılması da məhz əhalinin və cəmiyyətin qorunması məqsədi daşıyıb.
Seyyed Əli Mocani, həmçinin, mediada yayılan itkilərlə bağlı statistikaya toxunaraq bildirib ki, bəzi məlumatlar reallığı əks etdirmir. Onun sözlərinə görə, həlak olanların sayı az olmasa da, yalnız bir gün ərzində Tehranda 100 nəfər ölüb. Lakin dəqiq ölən və xəsarət alanların sayının müəyyən edilməsi üçün polis, hüquq-mühafizə orqanları, xəstəxanalar, xilasedici qurumlar tərəfindən geniş araşdırma aparılmalı, həmçinin müşahidə kameralarının görüntüləri öyrənilməlidir.
