Gürcüstan Prokurorluğu sabiq baş nazir İrakli Qaribaşvili ilə prosessual razılaşma bağladı – 5 il həbs cəzası verildi

Gürcüstan Prokurorluğu sabiq baş nazir İrakli Qaribaşvili ilə prosessual razılaşma bağlayıb. Razılaşmaya əsasən, ona 5 il müddətinə azadlıqdan məhrumetmə cəzası təyin edilib. Bundan əlavə, əlavə cəza olaraq 1 milyon lari məbləğində cərimə tətbiq olunub.

InterPress.ge xəbər verir ki, prokurorluğun yaydığı məlumata görə, İrakli Qaribaşvili Gürcüstan Cinayət Məcəlləsinin 194-cü maddəsinin üçüncü hissəsi ilə nəzərdə tutulan cinayəti törətməkdə təqsirli bilinib. Həmin maddə çirkli pulların leqallaşdırılması ilə bağlı cinayəti əhatə edir.

Bildirilib ki, sabiq baş nazir törətdiyi əməli etiraf edib və prosessual razılaşmanın şərtləri ilə razılaşıb. Razılaşmaya əsasən, cinayət fəaliyyəti nəticəsində əldə edildiyi iddia olunan və yaşayış evində aparılan axtarış zamanı götürülmüş pul vəsaiti dövlətin xeyrinə müsadirə ediləcək.

Gürcüstan Prokurorluğunun vəsatətini məhkəmə artıq təmin edib.