Polis əməkdaşına qrup halında hücum: dörd nəfər saxlanılıb

Gürcüstan Daxili İşlər Nazirliyinin İmereti Polis Departamentinin Çiatura rayon idarəsinin əməkdaşları xidməti fəaliyyətlə əlaqədar polis əməkdaşına qrup halında hücum etmək ittihamı ilə dörd nəfəri saxlayıblar.

InterPress.ge xəbər verir ki, bu barədə Gürcüstan Daxili İşlər Nazirliyi məlumat yayıb.

Nazirliyin açıqlamasına əsasən, saxlanılan şəxslər 2008-ci il təvəllüdlü S.İ., 1999-cu il təvəllüdlü G.Ş., 2000-ci il təvəllüdlü A.M. və 1994-cü il təvəllüdlü M.Ş.-dir. İstintaqla müəyyən edilib ki, şübhəlilər xidməti vəzifəsini yerinə yetirən Patrul Polisi Departamentinin patrul-inspektoru ilə sözlü mübahisəyə girib, daha sonra qrup halında ona hücum edərək fiziki xəsarətlər yetiriblər.

Qurumun məlumatına görə, hücum nəticəsində patrul-inspektor bədəninin müxtəlif nahiyələrindən xəsarət alıb, təqsirləndirilən şəxslər isə hadisə yerindən qaçıblar. Keçirilən operativ-axtarış tədbirləri və istintaq hərəkətləri nəticəsində dörd nəfər qısa müddətdə saxlanılıb.

Faktla bağlı istintaq Gürcüstan Cinayət Məcəlləsinin 353-cü prima maddəsi ilə aparılır. Sözügedən maddə 8 ilədək azadlıqdan məhrumetmə cəzasını nəzərdə tutur.