Mixeil Saakaşvili: “Maduronun tutulması İvanişvili üçün ciddi siqnaldır”

Hazırda həbsdə olan Gürcüstanın sabiq prezidenti Mixeil Saakaşvili sosial şəbəkədə yaydığı geniş açıqlamada Venesuelada baş verən son hadisələrin Bidzina İvanişvili üçün ciddi xəbərdarlıq xarakteri daşıdığını bildirib.

InterPress.ge xəbər verir ki, o,bu barədə şəxsi facebook hesabında qeyd edib.

Saakaşvilinin sözlərinə görə, Venesuela prezidenti Nicolás Maduronun qısa müddətdə saxlanılmasının əsas səbəbi onun öz çevrəsi tərəfindən “təslim edilməsi” olub. O vurğulayıb ki, bu fakt Gürcüstandakı mövcud hakimiyyət üçün də mühüm paralellər yaradır.

Sabiq prezidentin iddiasına əsasən, Gürcüstanın baş naziri İrakli Kobaxidze və onun komandası yaxşı bilir ki, Bidzina İvanişvili ölkədə “ailə diktaturası” formalaşdırmaq və oğlu Tsotneni baş nazir postuna gətirmək niyyətindədir. Saakaşvili qeyd edib ki, hakim komandadakılar həm öz sələflərinin aqibətini, həm də İvanişvilinin yaşını və davranış modelinin dəyişməzliyini yaxşı anlayırlar.

Onun fikrincə, istisna edilmir ki, Rusiyanın Federal Təhlükəsizlik Xidməti – FSB – Gürcüstanın Moskvanın nəzarətinə daha möhkəm verilməsi müqabilində Kobaxidzenin ətrafını İvanişvilini kənarlaşdırmağa təşviq edə bilər.

Saakaşvili bildirib ki, ABŞ-ın tələblərinə etinasız yanaşma Venesuela nümunəsində olduğu kimi ciddi nəticələrə səbəb ola bilər. Onun sözlərinə görə, Maduronun saxlanılması Amerika qanuni tələblərinə qarşı çıxmağın nəticəsidir və Gürcüstan hakimiyyətinə göndərilmiş məktubda da əsas tələb siyasi məhbusların azadlığa buraxılmasıdır.

Sabiq prezident qeyd edib ki, İvanişvili hər ay minlərlə məmura, hakimlərə, təhlükəsizlik strukturlarına və patriarxlığa maliyyə dəstəyi göstərsə də, hökumət üzvləri onun iştirakı olmadan daha çox qazanc əldə edə və daimi qorxu mühitindən xilas ola bilərlər. Saakaşvilinin iddiasına görə, institusional baxımdan polis, xüsusi xidmət orqanları və prokurorluq faktiki olaraq Kobaxidzenin və onun qrupunun nəzarətindədir.

O, həmçinin bildirib ki, İvanişvili mahiyyət etibarilə “rus tipli bir rejim” formalaşdırıb, lakin buna baxmayaraq Kreml ondan narazıdır. Saakaşvilinin sözlərinə görə, Rusiya prezidenti Vladimir Putin İvanişvilinin əsas vədi – Abxaziya və Cənubi Osetiyanın müstəqilliyinin tanınması – yerinə yetirməməsindən məmnundur deyil.

Sabiq prezident vurğulayıb ki, İvanişvili bu istiqamətdə müəyyən addımlar atsa da, ərazilərin tanınmasının gürcü xalqının səbr kasasını daşıracağını bildiyi üçün buna cəsarət etmir. Onun fikrincə, məhz bu səbəbdən Moskvanın mövcud status-kvodan narazılığı getdikcə açıq şəkildə ifadə olunur.

Saakaşvili bəyan edib ki, İvanişvili Rusiyayla əməkdaşlığa və gürcü dövlətçiliyinin sarsıdılmasına görə məsuliyyət daşıyır, lakin Gürcüstan xalqı ölkənin müstəqilliyinin tam formal şəkildə itirilməsinə layiq deyil. O qeyd edib ki, gürcü xalqı təslim olmur və mübarizəni davam etdirir.

Sonda Saakaşvili bildirib ki, mövcud vəziyyət fonunda atılmalı olan addımlar barədə yaxın günlərdə ayrıca açıqlama verəcək.