Ərzaq məhsullarının qiymətləri ilə bağlı hökumət yanında əlaqələndirmə komissiyası yaradılıb

Ərzaq məhsullarının qiymətləri ilə bağlı hökumət yanında əlaqələndirmə komissiyası yaradılıb və komissiyaya Gürcüstanın baş naziri İrakli Kobaxidze rəhbərlik edəcək.

InterPress.ge xəbər verir ki, bu barədə məlumatı Hökumət Administrasiyası yayıb.

Qurumun açıqlamasına görə, müvafiq sərəncam hökumətin dünən keçirilən iclasında təsdiqlənib. Bildirilib ki, komissiyanın tərkibinə aidiyyəti sahələr üzrə nazirlər, Hökumət Administrasiyasının nümayəndələri və Rəqabət Agentliyi daxil olacaq.

Hökumət Administrasiyasının rəhbəri Levan Jorjolian bildirib ki, baş nazir ərzaq məhsullarında müşahidə olunan qiymət artımları barədə geniş danışıb və vurğulayıb ki, bu məsələ daha dərindən araşdırılmalıdır. Onun sözlərinə görə, bir çox hallarda qiymət artımları heç bir məntiqə əsaslanmır və bu da birbaşa istehlakçılara mənfi təsir göstərir.

Levan Jorjolianın qeyd etdiyi kimi, yeni yaradılan hökumət komissiyasının əsas məqsədi ərzaq qiymətləri ilə bağlı proseslərin daha səmərəli şəkildə əlaqələndirilməsi və mövcud problemlərin hərtərəfli təhlil olunmasıdır.