Levan Maxaşvili: Ərzaq qiymətlərindən heç kim razı deyil, kartel razılaşmaları aşkar olunarsa qərarlar veriləcək
"Ölkədə ərzaq məhsullarının qiymətləri cəmiyyətdə ciddi narazılıq doğurur və mövcud vəziyyətin normal olmadığı açıq şəkildə görünür."
InterPress.ge xəbər verir ki, bu barədə Parlamentin Avrointeqrasiya Komitəsinin sədri Levan Maxaşvili jurnalistlərə açıqlamasında bildirib.
Onun sözlərinə görə, əgər parlament araşdırması zamanı biznes subyektlərinin dar kommersiya maraqları naminə əhalinin mənafeyinə zidd şəkildə monopoliya və ya kartel razılaşmaları həyata keçirdiyi müəyyən olunarsa, müvafiq qərarlar qəbul ediləcək.
Maxaşvili qeyd edib ki, parlament araşdırması çərçivəsində bütün detallar hərtərəfli şəkildə öyrəniləcək. O vurğulayıb ki, qəbul ediləcək qərarların məqsədi biznesə təzyiq göstərmək, onu bağlamaq və ya şantaj etmək deyil. Məqsəd bir tərəfdən biznesin fəaliyyətini davam etdirərək mənfəət əldə etməsinə imkan yaratmaq, digər tərəfdən isə ərzaq bazarının tam nəzarət altına alınması səbəbindən yaranan yükün əhalinin üzərinə düşməsinin qarşısını almaqdır.
Komitə sədri bildirib ki, fakt ondan ibarətdir ki, qiymətlərdən demək olar ki, heç kim məmnun deyil və bu da sistemli problemlərin mövcudluğuna işarə edir. Onun sözlərinə görə, hər bir istiqamət ayrıca araşdırılmalıdır və ilkin qiymətləndirmələr göstərir ki, bəzi vəzifəli şəxslərin fəaliyyətində ciddi boşluqlar və nöqsanlar olub. Maxaşvili qeyd edib ki, əgər həmin şəxslər öz vəzifələrini vicdanla yerinə yetirsəydilər, bu problemlərin bir hissəsi ümumiyyətlə yaranmaya bilərdi.
Levan Maxaşvili eyni zamanda müxalifətin ərzaq məhsullarının bahalaşmasını vergi siyasəti ilə əlaqələndirməsinə də münasibət bildirib və bu fikirləri tamamilə absur d adlandırıb. Onun sözlərinə görə, Gürcüstanda vergi siyasəti 2005-ci ildən bəri faktiki olaraq dəyişməyib, lakin buna baxmayaraq qiymət problemi mövcud olub.
Maxaşvili xatırladıb ki, əlavə dəyər vergisi, mənfəət vergisi və digər əsas vergi mexanizmləri uzun illərdir eyni şəkildə tətbiq olunur. O əlavə edib ki, 2017-ci ildən etibarən biznes subyektləri mənfəəti yenidən investisiyaya yönəltdikləri halda, ümumiyyətlə mənfəət vergisi ödəmirlər. Bu səbəbdən vergi yükünün artmadığını, əksinə, biznes üçün daha da azaldıldığını vurğulayıb və bildirib ki, hazırda vergi siyasətində hər hansı dəyişiklik planlaşdırılmır.
Qeyd edək ki, bundan əvvəl baş nazir İrakli Kobaxidze də açıqlama verərək Gürcüstanda ərzaq məhsullarının qiymətləri ilə Avropa ölkələri arasındakı fərqin əhəmiyyətli dərəcədə böyük olduğunu bildirib. Baş nazirin sözlərinə görə, bu fərq əsasən distribütor şirkətləri və market şəbəkələrinin yüksək qiymət artımı ilə bağlıdır və sərhəddən satış rəfinədək qiymət artımı orta hesabla 86 faiz təşkil edir. Kobaxidze hüquq-mühafizə orqanlarını məsələnin araşdırılmasına çağırıb və parlamentdən bu mövzu ilə bağlı xüsusi komissiyanın yaradılmasını xahiş edib.
