Kaxa Kaladze: Müxalifətin birləşməsindən danışmaq yersizdir, bu gün Gürcüstanda müxalifət yoxdur

“Gürcü Arzusu”nun baş katibi və Tbilisi meri Kaxa Kaladze müxalifətlə bağlı açıqlama verib. Kaladzenin sözlərinə görə, hazırkı şəraitdə müxalifətin birləşməsindən danışmaq mənasızdır, çünki ölkədə real müxalifət mövcud deyil.

Onun sözlərinə görə, sağlam siyasi rəqabət ölkə üçün vacib olsa da, bu gün Gürcüstanda belə bir siyasi qüvvə yoxdur. Kaladze bildirib ki, müxalifətin olmaması dövlət üçün müsbət hal sayılmır, çünki hakimiyyətin daim formada qalması üçün güclü və məsuliyyətli müxalifət zəruridir.

Tbilisi meri vurğulayıb ki, hazırda ölkədə müxalifət adı altında fəaliyyət göstərənlər əsasən radikal qruplardır və onlar xaricdən idarə olunurlar. Onun fikrincə, bu qüvvələrin əsas məqsədi ölkənin maraqlarını qorumaq deyil və onlar Gürcüstanın əleyhinə addımlar atmağa hazırdırlar.

Kaladze əlavə edib ki, həmin qruplar ölkəyə qarşı açıq xəyanət nümayiş etdiriblər və bunun konkret nümunələri mövcuddur. O, bu kontekstdə vizasız rejimlə bağlı sənədlərin imzalanmaması, Gürcüstanın namizəd ölkə statusu almaması üçün aparılan fəaliyyətləri xatırladaraq, bəzi siyasi dairələrin bununla fəxr etdiyini bildirib.

Kaxa Kaladzenin sözlərinə görə, bu cür yanaşmalar Gürcüstanın milli maraqlarına ziddir və ölkənin gələcək inkişafına ciddi təhlükə yaradır.