Euractiv: Avropa İttifaqı 2024-cü ildə Rusiyadan 709 milyon avroluq balıq alıb
Avropa İttifaqının Rusiyadan balıq idxalını məhdudlaşdırmaq cəhdlərinə baxmayaraq, rus mənşəli balıq məhsulları Avropa bazarına daxil olmağa davam edir.
InterPress.ge xəbər verir ki, bu barədə Euractiv nəşri yazır.
Məqalədə qeyd olunur ki, Portuqaliyada sobada bişirilmiş treskadan Polşada xırtıldayan qızardılmış variantlara qədər rus balığı hələ də Avropa süfrələrində yer alır. Bu, idxalın məhdudlaşdırılması istiqamətində atılan addımlara baxmayaraq baş verir.
Euractiv-in yazdığına görə, Avropa İttifaqının bəzi üzv ölkələri Rusiyaya qarşı daha sərt məhdudiyyətlərin tətbiqinə çalışır, digərləri isə Aİ-nin Moskvanın tutduğu balıq məhsullarından həddindən artıq asılı olduğu barədə xəbərdarlıq edir.
“Baltikyanı ölkələr, Finlandiya və İsveç Kremlə iqtisadi rıçaqlar vasitəsilə təzyiq göstərmək və onu Ukraynaya qarşı müharibəni dayandırmağa məcbur etmək üçün daim yeni yollar axtarır. Onlar Rusiya ilə Baltik dənizini bölüşdüklərinə görə, balıq məsələsi bu kontekstdə xüsusi əhəmiyyət daşıyır. Bu ölkələr hesab edirlər ki, Moskvanın balıqçılıq donanmasına ciddi zərbə vurmaq mümkündür və dəfələrlə Aİ-yə daxil olan rus dəniz məhsullarına tariflərin artırılmasını tələb ediblər”, – deyə nəşr yazır.
Euractiv bildirir ki, Rusiyanın iki ən iri balıqçılıq şirkəti – Norebo və Murman Seafood – son vaxtlar Aİ sularında dövlət tərəfindən maliyyələşdirilən casusluq fəaliyyəti həyata keçirməkdə təqsirli bilinib və onlara sanksiyalar tətbiq olunub. Buna baxmayaraq, Avropa Komissiyası balıq idxalına əlavə məhdudiyyətlərin tətbiqi ilə bağlı çağırışları hələlik kənara qoyub. Bu ideyaya Aİ-yə üzv bir çox ölkə ehtiyatla yanaşır.
Latviyanın kənd təsərrüfatı və balıqçılıq naziri Armands Krauze Euractiv-ə açıqlamasında bildirib ki, bu məsələ ilə bağlı dəstək qazanmaq üçün işlərini davam etdirir.
Avropa Komissiyası isə ictimai açıqlamalarında rus balığından asılılığın azaldılması üçün artıq kifayət qədər addımlar atıldığını bildirir. Ukraynaya qarşı müharibə başlayandan qısa müddət sonra Aİ nisbətən “asan hədəf” seçərək, şampan və brilyantlarla yanaşı, Rusiyadan xaviar idxalını qadağan edib. Halbuki Rusiya bu məhsulun Aİ-yə çox kiçik hissəsini ixrac edirdi.
Buna qarşılıq olaraq, daha geniş istifadə olunan balıq məhsulları, xüsusilə treska və Alyaska polloku Aİ bazarına daxil olmaqda davam edib və bəzi hallarda gömrük rüsumu da tətbiq olunmayıb. 2024-cü ildən etibarən bu məhsullar tarif güzəştlərindən məhrum edilsə də, Aİ həmin il Rusiyadan ümumilikdə 709 milyon avro dəyərində balıq alıb.
Məlumata görə, rus balığının əsas idxalçıları Niderland, Almaniya, Fransa və Polşa olub.
