Şalva Papuashvili: Gürcüstan 2025-ci ildə misli görünməmiş xarici təzyiqlərə tab gətirdi

"Ötən siyasi ilin yekunlarını, mövcud beynəlxalq reallığı və gələcək baxışı diplomatik korpusla bölüşmək imkanı əldə etməkdən məmnundur."

InterPress.ge xəbər verir ki, bu barədə Gürcüstan Parlamentinin sədri Şalva Papuashvili səfirlərin konfransında çıxışı zamanı bildirib.

Onun sözlərinə görə, artıq formalaşmış faktdır ki, Gürcüstan 2025-ci il ərzində ölkənin daxili işlərinə müdaxilə, daxili siyasi proseslərin süni şəkildə dəyişdirilməsi və ictimai rəyin manipulyasiyası məqsədi daşıyan misli görünməmiş xarici təzyiq və basqılara davam gətirib.

Parlament sədrinin qeyd etdiyinə görə, bu gün artıq hər kəs üçün aydındır ki, Gürcüstan ətrafında baş verən hadisələr daxili proseslərin nəticəsi deyil, Ukraynada davam edən müharibənin dördüncü ili və böyük güclər arasında açıq rəqabət fonunda regional və qlobal qarşıdurmaların proyeksiyası olub.

Şalva Papuashvili vurğulayıb ki, ötən il qlobal dəyişikliklər, dramatik proseslər və ziddiyyətlərlə zəngin olub və həmin dövrdə baş verən əsas hadisələrdən biri beynəlxalq münasibətlərdə formalaşan yeni mənzərə, dövlətlərin mövqeləri və aralarında yaranan yeni paritetdir. Onun sözlərinə görə, son dörd il ərzində mübahisə mövzusu olan bir çox müddəalar artıq müzakirə predmeti deyil.

O qeyd edib ki, qlobal təhlükəsizlik arxitekturası faktiki olaraq dağılıb, unipolyar dünya nizamı mövcudluğunu itirib və soyuq müharibədən sonrakı beynəlxalq münasibətlər dövrü başa çatıb. Dövlətlər yeni güc balansı axtarışındadır və bu prosesdə hər bir aktor öz milli maraqlarını maksimum dərəcədə qorumağa çalışır.

Parlament sədrinin sözlərinə görə, milli maraq artıq nəzəri anlayış deyil, dövlət siyasətini müəyyən edən əsas kateqoriyaya çevrilib. Dövlətlər qərarları məhz milli maraqlar prizmasından qəbul edir, alyanslar qurur və təsir dairələrini formalaşdırırlar. Artıq tarixin “işıqlı və qaranlıq tərəfləri”, geosiyasi “xeyir və şər” kimi sadə qarşıdurmalar mövcud deyil, əvəzində rəqabət aparan supergüclər və çoxqütblü dünyanın konturları meydana çıxır.

Şalva Papuashvili bildirib ki, mövcud reallıqda ABŞ faktiki olaraq “dünya polisi” rolundan imtina edir və yeni Amerika doktrinaları açıq şəkildə göstərir ki, Vaşinqton bundan sonra resurslarını başqa ölkələrə öz sivilizasiya modelini zorla qəbul etdirməyə sərf etməyəcək. ABŞ siyasətinin əsas və dəyişməz prioriteti öz milli maraqlarıdır.

Onun sözlərinə görə, Avropa və Avropa İttifaqı da strateji qeyri-müəyyənlik dövrü ilə üz-üzədir və artıq anlayır ki, nə dünənki vəziyyət qalır, nə də bu günün reallığı gələcəyi asanlıqla proqnozlaşdırmağa imkan verir.

Bu fon üzərində Gürcüstanın seçdiyi siyasətin mahiyyəti daha aydın görünür. Papuashvili vurğulayıb ki, Gürcüstan ən təhlükəli mərhələdə onu aktiv rol almağa məcbur etdikləri, əvvəlcədən uduzulmuş ssenaridə iştirakdan imtina edib və bu təzyiqlərə xalqın dəstəyi ilə dözüb.

Parlament sədrinin fikrincə, Gürcüstanın seçdiyi sülh siyasəti zəiflik deyil, məsuliyyətli və dövlətçilik baxımından düşünülmüş seçim olub və məhz bu doktrina ölkəni qoruyub. O qeyd edib ki, bu yanaşma 2026-cı ildə də, radikal tənqidlərə baxmayaraq, ölkənin daxili və xarici siyasətinin əsas dayağı olaraq qalacaq.

Şalva Papuashvili bildirib ki, Gürcüstan Ukraynada müharibənin başa çatmasını və davamlı sülhün bərqərar olmasını arzulayır, lakin müharibənin nə vaxt və hansı geosiyasi razılaşmalarla bitəcəyinin hələ də məlum olmadığını qeyd edib. Onun sözlərinə görə, dəyişməz olan yeganə həqiqət Gürcüstanın başqa vətəni olmadığıdır.

Parlament sədri vurğulayıb ki, “Gürcüstan hər şeydən öncə” prinsipi ölkənin əsas strategiyasıdır və bütün taktiki və operativ qərarlar bu yanaşmaya söykənməlidir. Gürcüstan hakimiyyəti suverenliyə və milli maraqlara hörmət edən hər kəslə konstruktiv dialoqa açıqdır, lakin təzyiq, şantaj və siyasi moralizmin dialoqu əvəz edə bilməyəcəyini xüsusi qeyd edib.

Sonda Şalva Papuashvili diplomatların üzərinə düşən xüsusi məsuliyyəti vurğulayaraq, onların ölkənin simasını təmsil etdiyini və milli maraqların müdafiəsində ön cəbhədə dayandığını bildirib, patriotizmə, peşəkarlığa və fədakar əməyə görə səfirlərə təşəkkür edib.