Mixeil Kavelaşvili: Xarici siyasət kursumuzun alternativi yoxdur
Mixeil Kavelaşvili “Səfirlərin Konfransı 2025”də çıxışı zamanı bildirib ki, onun qonşu ölkələrə — Azərbaycan, Ermənistan və Türkiyəyə, eləcə də sonradan BMT-yə və Serbiyaya etdiyi səfərlər Gürcüstanın xarici siyasət vektorunun alternativsiz olduğunu daha aydın şəkildə göstərib.
Kavelaşvili gürcü diplomatlara müraciət edərək ticarət və tranzit əlaqələrinin inkişafı üçün səylərini əsirgəməməyə çağırıb. Onun sözlərinə görə, ümumi məqsəd Gürcüstanın Cənubi Qafqazda əsas regional hab statusunu daha da möhkəmləndirməkdir. Bununla yanaşı, Asiya, Avropa və Yaxın Şərq kimi geniş coğrafi məkanların iqtisadi və dinc inteqrasiyasına maksimum töhfə verilməlidir.
Çıxışında vurğulayan Mixeil Kavelaşvili qeyd edib ki, ticarət-tranzit əlaqələrinin dərinləşdirilməsi yalnız qlobal əlaqəliliyi gücləndirməyəcək, eyni zamanda Gürcüstanı onun tarixi və sivilizasion yolayrıcı roluna yenidən qaytaracaq.
O əlavə edib ki, Gürcüstan təkcə Orta Dəhlizin əsas qovşaqlarından biri deyil, həm də əsrlər boyu müxtəlif mədəniyyətlərin sülh şəraitində birgə yaşadığı unikal sivilizasion dialoq məkanıdır.
