Zaza Şatirişvili: “Bu faktlar Trampın ‘dərin dövlət’lə mübarizəsinin saxta olduğunu açıq şəkildə göstərir”
Filosof Zaza Şatirişvilinin yayımladığı növbəti məktubda qeyd olunur ki, indiyədək toxunmadığı daha iki mühüm mövzu var və bu mövzular Trampın “dərin dövlət”lə (qeyri-formal oliqarxik idarəçiliklə) mübarizə apardığı iddialarının saxta olduğunu birbaşa ifşa edir. Şatirişvilinin fikrincə, bu faktlar eyni zamanda Trampın oliqarxik ailələrin müttəfiqi olduğunu və onların tapşırığı ilə “rebrendinq” prosesində iştirak etdiyini açıq şəkildə ortaya qoyur.
Məktubda bildirilir ki, bir neçə gün əvvəl Tramp tərəfindən seçilmiş namizədlərlə formalaşdırılan məhkəmə eynicinsli şəxslərin nikahının ləğvi ilə bağlı iddianı ümumiyyətlə icraata qəbul etməyib. Şatirişvili xatırladır ki, seçkiqabağı dövrdə və ondan sonrakı bir neçə ay ərzində Tramp LGBT ideologiyasına qarşı sərt mövqe nümayiş etdirir, eynicinsli nikahların ləğv ediləcəyini və bu həyat tərzinin təbliği ilə məşğul olanların cəzalandırılacağını bəyan edirdi. Filosofun sözlərinə görə, nə liberal, nə də mühafizəkar Amerika mediası bir neçə gün əvvəl baş verən bu mühüm hadisəni işıqlandırıb. Belə ki, Respublikaçı Partiyanın kvotası ilə, Trampın seçdiyi hakimlərdən ibarət Ali Məhkəmə eynicinsli nikahların ləğvi ilə bağlı iddianı baxılmağa belə qəbul etməyib. Halbuki Tramp administrasiyası, şəxsən prezidentin özü seçki kampaniyasını məhz bu mövzu üzərində qurmuş və LGBT təbliğatının, psevdoliberal ideologiyanın bəşəriyyət üçün böyük təhlükə olduğunu iddia etmişdi.
Şatirişvili məktubunda ABŞ-da hər il təxminən 10 min insanın cərrahi yolla cinsiyyət dəyişdirdiyini də vurğulayır. Onun sözlərinə görə, bu məsələ Trampın gündəliyinə salınmayıb və digər seçkiqabağı vədlər kimi diqqətdən kənarda qalıb. Filosof bildirir ki, Tramp seçki kampaniyası zamanı cinsiyyət dəyişmə əməliyyatlarına müxtəlif yollarla dəstək verən şəxslərin ciddi şəkildə cəzalandırılacağına dair Amerika xalqına söz vermişdi.
Məktubda qeyd olunur ki, rəsmi statistikaya əsasən ABŞ-da hər il 10 min nəfər cərrahi müdaxilə ilə cinsiyyətini dəyişir, qeyri-rəsmi rəqəmlər isə bunun ən azı üç dəfə çox olduğunu göstərir. Bu əməliyyatların konkret həkimlər tərəfindən, konkret klinikalarda həyata keçirildiyi, müəyyən fondlar tərəfindən maliyyələşdirildiyi və müəyyən media qurumları tərəfindən təbliğ edildiyi vurğulanır. Şatirişvili sual edir ki, bu günə qədər bu prosesdə iştirak edənlərdən kiminsə cəzalandırıldığı, mövzunun Trampın gündəliyinə salındığı və ya hər hansı bir həkimin məhkəmə qarşısına çıxarıldığı görünübmü? Filosofun fikrincə, cavab aydındır və bu mövzu da Tramp tərəfindən “dərin dövlət”ə qarşı elan olunan mübarizə çərçivəsində verdiyi digər vədlər kimi gündəmdən çıxarılıb.
