Gürcüstanda qanunsuz yaşayan 28 xarici ölkə vətəndaşı saxlanılıb

Gürcüstan Daxili İşlər Nazirliyinin Miqrasiya Departamentinin əməkdaşları ölkədə qanuni əsas olmadan yaşayan bir sıra xarici ölkə vətəndaşlarını saxlayıblar.

InterPress.ge xəbər verir ki, bu barədə Gürcüstan Daxili İşlər Nazirliyi məlumat verib. 

Nazirliyin yaydığı məlumata görə, kompleks tədbir nəticəsində ümumilikdə 28 xarici ölkə vətəndaşı tutulub. Saxlanılanlar İran, Hindistan, Nigeriya, Pakistan, Türkmənistan, Nepal, Syerra-Leone, Banqladeş, İordaniya, Efiopiya və Əfqanıstan vətəndaşlarıdır.

Məlumatda bildirilir ki, qeyri-qanuni miqrasiyaya qarşı mübarizə çərçivəsində Miqrasiya Departamentinin əməkdaşları xüsusi miqrasiya nəzarəti tədbiri həyata keçiriblər. Əldə olunan məlumatlar əsasında ölkə ərazisində konkret məkanlar yoxlanılıb və məqsəd Gürcüstanda qanuni əsas olmadan yaşayan xarici ölkə vətəndaşlarının aşkarlanması olub.

Aparılan yoxlamalar nəticəsində saxlanılan şəxslərin “Xarici vətəndaşların və vətəndaşlığı olmayan şəxslərin hüquqi vəziyyəti haqqında” Gürcüstan qanununun tələblərini pozaraq ölkədə qaldıqları müəyyən edilib.

Hazırda saxlanılan şəxslər Miqrasiya Departamentinin müvəqqəti yerləşdirmə mərkəzinə yerləşdiriliblər. Onların ölkədən çıxarılması məqsədilə müvafiq prosedurlar həyata keçirilir.

Nazirliyin məlumatına görə, Miqrasiya Departamenti qeyd olunan qanunun effektiv icrasını təmin etmək üçün xüsusi miqrasiya nəzarəti tədbirlərini mütəmadi olaraq davam etdirir.