İrakli Kobaxidze: “50, 100 və ya 150 nəfər 4 milyon insanın iradəsinə qarşı çıxa bilməz”
"Azsaylı qrupların genişmiqyaslı blokadalar yaratması yolverilməzdir."
InterPress.ge xəbər verir ki, bu barədə Gürcüstanın Baş naziri İrakli Kobaxidze parlamentdə müzakirə olunan “Yığıncaqlar və nümayişlər haqqında” qanuna dəyişikliklərə münasibət bildirərək bildirib.
Baş nazirin sözlərinə görə, qanunvericilikdə nəzərdə tutulan bütün dəyişikliklər eyni prinsipə əsaslanır:
“Əgər azlıqsınızsa, buna uyğun şəkildə etiraz etməlisiniz. Əgər çoxsunuzsa, küçələri də, prospektləri də bağlaya bilərsiniz. Amma 50, 100, hətta 150 nəfər 4 milyon insanın iradəsinə zidd hərəkət edə bilməz. Məsələ çox sadədir. Həm qəbul edilmiş, həm də parlamentdə təşəbbüs kimi təqdim edilmiş bütün qanunlar bu məntiqə əsaslanır,” – deyə Kobaxidze vurğulayıb.
Hökumət başçısı əlavə edib ki, etirazların keçiriləcəyi yerin dəyişdirilməsi ilə bağlı əvvəlcədən xəbərdarlıq beynəlxalq standartlara tam uyğundur və Strasburq Məhkəməsinin təcrübəsinə əsaslanır:
“Xəbərdarlıq öhdəliyi konstitusiyada və qanunvericilikdə əvvəldən mövcud idi. Bu, təkcə bizdə yox, digər ölkələrdə də tətbiq olunan təcrübədir. Əgər müəyyən şərtlər yaranarsa, aidiyyəti qurum etirazın başqa məkanda keçirilməsini təklif edə bilər. Bu, Strasburq məhkəməsinin təsdiqlədiyi beynəlxalq standartdır və biz bütün qanunları məhz bu təcrübəni nəzərə alaraq qəbul edirik. Biz 4 milyon insanın maraqlarını qorumağa borcluyuq.”
Qeyd edək ki, təqdim olunan dəyişikliklərə görə, insanlar üçün nəzərdə tutulmuş hərəkət zonasındakı aksiyalar zamanı Daxili İşlər Nazirliyinin əvvəlcədən xəbərdarlıq etməsi məcburi olacaq. Bundan əlavə, iştirakçı sayının tələb etmədiyi hallarda yolun piyada hissəsinin süni şəkildə bağlanması qadağan ediləcək. Yolun avtomobillərlə, konstruksiyalarla və müxtəlif əşyalarla məhdudlaşdırılması da yolverilməz hesab edilir.
