İrakli Kirkxaliya: “Böyük Britaniyadan və onun nəzarətində olan mediadan Gürcüstana qarşı dezinformasiya axını başlayıb”

Parlamentin plenar iclasında çıxış edən “Gürcü Arzusu” fraksiyasının sədri və parlament çoxluğunun lideri İrakli Kirkxaliya son günlər Gürcüstana qarşı Böyük Britaniya hökuməti və onun təsiri altında olan media tərəfindən məqsədli dezinformasiya kampaniyası aparıldığını bildirib.

Kirkxaliya çıxışında Böyük Britaniyanın keçmiş baş naziri Liz Trassin sözlərini sitat gətirərək qeyd edib ki, onun ifadələrinə şübhə etmək üçün heç bir əsas yoxdur.

Deputat Trassin ölkəsindəki vəziyyətlə bağlı dediyi fikirləri oxuyaraq vurğulayıb ki, bu sitatlar hazırda ona qarşı ittihamlar səsləndirən dövlətin real durumunu ən yaxşı şəkildə əks etdirir.

Kirkxaliya Trassin sözlərini belə təqdim edib:

“Kiçik biznes ölür, böyük biznes ölkəni tərk edir. İnsanlar stomatoloqa getmək imkanı olmadığı üçün öz dişlərini özləri çıxarmağa məcbur qalırlar. Ölkəyə elə miqrantlar gəlir ki, məqsədləri məhz bu dövləti məhv etməkdir — fərqli ölkələrdən olan dəstələr on illərdir gənc qızlara qarşı ağlasığmaz seksual cinayətlər törədiblər və bu cinayətlər hakimiyyət tərəfindən gizlədilib.
Heç kimi ölkədən çıxara bilmirik, çünki insan haqları şəbəkəsi və məhkəmə sisteminin diversifikasiyası buna mane olur. İnsanlar ümidsizdir, amma bu barədə danışmaq hüququ belə yoxdur. Əgər transgender ideologiyasına qarşı fikir bildirsəniz, istənilən vaxt, istənilən yerdə sizi həbs edə bilərlər — Hitrou hava limanında, evinizdə, ofisinizdə.
Söz azadlığını ixtira edən və 1695-ci ildə azad mətbuatı yaradan ölkə bu gün dövlət senzurasının beşiyidir. Bu fəlakəti — Böyük Britaniyanın, İngiltərənin və Londonun tənəzzülünü — öz xalqını sevməyən hakim elita idarə edir. BBC isə bu prosesdə dezinformasiyanın yayılmasının əsas alətinə çevrilib və məmnunam ki, prezident Tramp bu ikiüzlüləri ifşa etdi.”

Kirkxaliya bildirib ki, bu sözlər Böyük Britaniyada mövcud vəziyyəti ən dəqiq şəkildə göstərir və həmin ölkənin Gürcüstana qarşı “əsassız və çirkli hücumlarla” çıxış etməsi qəbuledilməzdir.

“Siz öz ölkənizə baxın, öz xalqınıza qulaq asın... Bizim Liz Trassin dediklərinə şübhə etməyə heç bir əsasımız yoxdur. Çox sağ olun!” — deyə İrakli Kirkxaliya çıxışını tamamlayıb.