Levan Maçavariani “Fara” sənədi ilə bağlı – “Milli Hərəkat”la lobbi şirkətləri arasında imzalanmış müqavilələrin dəfələrlə şahidi olmuşuq

“Gürcü Arzusu”nun parlament fraksiyasının sədrinin birinci müavini Levan Maçavariani ABŞ Ədliyyə Departamentinin xarici agentlərin reyestrində (FARA) dərc edilmiş sənədlərlə bağlı açıqlama verib.

Maçavarianinin sözlərinə görə, onlar dəfələrlə “Vahid Milli Hərəkat” partiyası ilə müxtəlif lobbist şirkətlər arasında bağlanmış müqavilələri FARA sənədlərində görüblər və bu, həmin siyasi qüvvənin xarici lobbist strukturlarla uzunmüddətli əməkdaşlığını bir daha təsdiqləyir.

Maçavariani bildirib ki, Avropa Parlamentində qəbul olunan bir sıra qətnamələrin mətnlərində lobbist şirkətlərin izi aydın görünürdü:

“Biz FARA sənədlərində ‘Milli Hərəkat’ ilə konkret lobbist şirkətlər arasında bağlanmış müqavilələri dəfələrlə görmüşük. Xalqımıza xatırlatmaq istəyirəm: Avropa Parlamentinin artıq yeddinci qətnaməsi qəbul ediləndə, çoxları buna diqqət yetirmirdi. Çox hallarda ortaya çıxırdı ki, qətnamə mətnləri məhz həmin lobbist şirkətlərdən göndərilmişdi. Həmin şirkətlərlə isə ‘Milli Hərəkat’ın rəsmi müqaviləsi var idi. Bu, FARA sənədləri ilə də təsdiqlənir.”

Maçavariani əlavə edib ki, yayımlanan yeni sənədlər siyasi proseslərdə xarici təsirin miqyasını daha da açıq şəkildə göstərir.