Azərbaycan-Gürcüstan Media Forumunda informasiya təhlükəsizliyi və media savadlılığının artırılması geniş müzakirə olunub

Azərbaycanın paytaxdı Bakı şəhərində keçirilən Azərbaycan-Gürcüstan Media Forumunda informasiya təhlükəsizliyinin təmin edilməsi, dezinformasiya ilə mübarizə, media ekosisteminin gücləndirilməsi və media savadlılığının artırılması mövzularında iki geniş panel sessiya keçirilib.

InterPress.ge xəbər verir ki, panel discussionsında Azərbaycan və Gürcüstandan media rəhbərləri, ekspertlər və akademiklər iştirak ediblər.

Moderator Fazil Novruzovun idarə etdiyi sessiyada "ARB 24" telekanalının icraçı direktoru Radik İsmayılov, Gürcüstanın “Eurocracy – Former Europe” proqramının aparıcısı İoane Şaişmelaşvili, MEDİA-nın Hüquq şöbəsinin müdiri Adil Tağıyev, Gürcüstan İctimai Televiziyasının “Rəngarəng Gürcüstan” layihəsinin rəhbəri Ramiliya Əliyeva çıxış ediblər. Müzakirələrdə informasiya müharibələri, manipulyativ məzmunların yayılması, sosial medianın artan təsiri və süni intellekt texnologiyalarının mediada yeni risklər yaratması məsələləri önə çəkilib.

Radik İsmayılov generativ süni intellekt dövründə xəbərlərin doğruluğunu müəyyənləşdirməyin daha çətinləşdiyini və dezinformasiyanın sürətlə yayılmasının cəmiyyət üçün ciddi təhlükə olduğunu qeyd edib.

Ramiliya Əliyeva isə süni intellektin həm üstünlüklər, həm də əlavə məsuliyyətlər gətirdiyini vurğulayıb.

İoane Şaişmelaşvili son illərdə beynəlxalq media qurumlarının belə dezinformasiyaya yol verdiyini nümunələrlə açıqlayıb.

Adil Tağıyev isə informasiya təhlükəsizliyinin artıq milli təhlükəsizliyin ayrılmaz hissəsinə çevrildiyini bildirib.

Forumun digər panelində isə MEDİA-nın departament direktoru Ləman İsgəndərova media savadlılığının artırılması istiqamətində görülən işlərdən danışıb. O bildirib ki, 2022-ci ildən etibarən media savadlılığı konfransları keçirilir və bu sahədə həm formal, həm də qeyri-formal təhsil üsullarından istifadə olunur. Bu çərçivədə 25 şəhər və rayonda 3 minə yaxın vətəndaş maarifləndirilib. O əlavə edib ki, media savadlılığının məktəblərdə daha effektiv tədrisi üçün inteqrasiya modelləri üzərində araşdırmalar aparılır.

BDU-nun Jurnalistika fakültəsinin dekanı Vüqar Zifəroğlu media savadlılığı fənninin orta məktəb təhsilinə də daxil edilməsinin vacibliyini vurğulayıb.
Moderator Vəfa İsgəndərova isə MEDİA-nın müəllim və şagirdlər üçün təlimlər keçdiyini, informasiya savadı olsa belə insanların manipulyasiyaya məruz qala bildiyini qeyd edib.

Gürcü professor Maia Paçkoriya dezinformasiya və media manipulyasiyasının hər iki ölkə üçün ciddi təhlükə yaratdığını vurğulayaraq bildirib ki, jurnalistlər tarixi və siyasi prosesləri korrekt təqdim etmədikdə cəmiyyəti yanlış yönləndirə bilirlər. O, media məktəblərində tədrisin gücləndirilməsinin, jurnalistlərə siyasi-tarixi biliklərin verilməsinin zəruriliyini xüsusi qeyd edib.

Hər iki panel müzakirələr və sual-cavab sessiyaları ilə davam edib.