İrakli Kobaxidze Azərbaycandan gələn daxili işlər nazirini qəbul etdi
Gürcüstanın Baş naziri İrakli Kobaxidze ölkədə rəsmi səfərdə olan Azərbaycanın daxili işlər naziri Vilayət Eyvazovla görüş keçirib.
InterPress.ge xəbər verir ki, bu barədə məlumatı Baş nazirin mətbuat xidməti yayıb.
Görüşdə iki ölkə arasında mövcud səmərəli əməkdaşlıq və strateji tərəfdaşlığın daha da dərinləşdirilməsi perspektivləri müzakirə olunub. Qeyd edilib ki, illər ərzində Gürcüstan və Azərbaycanın hüquq-mühafizə orqanları arasında uğurlu ikitərəfli əməkdaşlıq formalaşıb. Tərəflər vurğulayıblar ki, bu gün imzalanmış əməkdaşlıq sazişi hər iki ölkənin Daxili İşlər Nazirlikləri arasında tərəfdaşlığın daha da möhkəmlənməsinə, xüsusilə cinayətlərin qarşısının alınması, aşkar edilməsi və zərərsizləşdirilməsi istiqamətlərində əməkdaşlığın genişlənməsinə xidmət edəcək.
Görüşdə həmçinin regionda sabitliyin və uzunmüddətli sülhün təmin edilməsinin vacibliyi müzakirə olunub.
Görüşdə daxili işlər naziri Geka Geladze, Hökumət Administrasiyasının rəhbəri Levan Jorjoliani, Gürcüstanın Azərbaycandakı fövqəladə və səlahiyyətli səfiri Zurab Pataradze və Azərbaycanın Gürcüstandakı fövqəladə və səlahiyyətli səfiri Faiq Quliyev də iştirak ediblər.
