İrakli Kobaxidze: "Gürcüstanda 'kollektiv Vahid Milli Hərəkatın' hakimiyyətə qayıdışına imkan verməyəcəyik"
Gürcüstanın Baş naziri İrakli Kobaxidze bildirib ki, ölkədə “kollektiv Vahid Milli Hərəkatın” hakimiyyətə qayıdışı mümkün deyil və buna heç vaxt imkan verilməyəcək.
InterPress.ge xəbər verir ki, Baş nazir bu barədə Avropa Komissiyasının müdafiə məsələləri üzrə komissarı Andrius Kubiliusun açıqlamasına cavab verərkən danışıb.
Kobaxidzenin sözlərinə görə, “qeyri-rəsmi təsirlərlə idarə olunan Avropa bürokratiyası” Gürcüstanda müxalifətin hakimiyyətə qayıdışını arzulayır, lakin bu, baş verməyəcək:
“Avropanın qeyri-rəsmi təsirlərlə yönləndirilən bürokratiyası Gürcüstanda ‘kollektiv Vahid Milli Hərəkat’ın’ hakimiyyətə qayıtmasını gözləməsin. Kollektiv Kubiliuslar buna nail ola bilməyəcəklər. Biz buna imkan verilməyəcəyinin zəmanətini veririk,” – deyə Baş nazir bildirib.
Hökumət başçısı həmçinin Aİ-nin genişlənmə məsələləri üzrə komissarı Marta Kosın bəyanatına münasibət bildirib. Onun sözlərinə görə, Avropa rəsmilərinin açıqlamaları onların Gürcüstana “qara kanallar vasitəsilə” vəsait daxil etdiyini göstərir:
“Onlar açıq şəkildə etiraf etdilər ki, vəsaiti gizli yollarla ölkəyə ötürməyin yollarını axtarırlar. Əgər ‘qara kanallar’ axtarırsansa, deməli, niyyətin də qaranlıqdır,” – deyə Kobaxidze bildirib.
Baş nazir əlavə edib ki, bu vəsaitlər illər ərzində QHT-lərin vasitəsilə Gürcüstanda beş dəfə hakimiyyət çevrilişinə cəhd göstərilməsi üçün xərclənib:
“Biz bilirik ki, əvvəlki administrasiyalar dövründə ABŞ və Avropa bürokratlarının pulları nəyə sərf olunurdu. Bu vəsait QHT-lərin vasitəsilə Gürcüstanda beş dəfə çevriliş cəhdinə yönəldilmişdi. Onlara ‘vətəndaş cəmiyyəti’ adı verirlər, lakin bu, reallığı əks etdirməyən saxta termindir. ‘Vətəndaş’ və ‘qeyri-vətəndaş’ cəmiyyəti deyilən anlayış mövcud deyil,” – deyə o vurğulayıb.
Kobaxidzenin fikrincə, məqsəd yenidən ölkədə xaos yaratmaqdır. O qeyd edib ki, dövlət öz maraqlarını qorumaqda davam edəcək:
“Onlar yenidən Gürcüstanda qarışıqlıq yaratmağa cəhd etmək üçün gizli yollarla vəsait gətirmək istəyirlər. Dövlət öz maraqlarını qorumağa davam edəcək – bunu keçmişdə necə etmişiksə, gələcəkdə də eyni qətiyyətlə edəcəyik,” – deyə Baş nazir bildirib.
