Gürcüstan birbaşa xarici investisiya indeksinə görə dünyanın ən yaxşı 20, Avropanın isə ən yaxşı 5 ölkəsi sırasına daxil olub

Gürcüstan birbaşa xarici investisiyalar (BXİ) indeksi üzrə dünyada 17-ci, Avropada isə ilk beş ölkə sırasında qərarlaşıb.

InterPress.ge xəbər verir ki, bu barədə məlumatı “Gürcü Arzusu” partiyası, Ümumdünya Əqli Mülkiyyət Təşkilatının (WIPO) 2025-ci il üzrə Qlobal İnnovasiya Hesabatında dərc olunmuş BXİ indeksinə istinadən yayıb.

Partiyanın məlumatına əsasən, 100 faizlik qiymətləndirmə sistemində Gürcüstan 60,23% nəticə göstərib və bu göstərici ilə dünyanın 17-ci, Avropanın isə ən yaxşı beş ölkəsi arasında yer alıb.

“Gürcüstan bu reytinqdə Böyük Yeddiliyə (G7) daxil olan bütün ölkələri, həmçinin Avropa İttifaqı və NATO-nun 30 üzv dövlətini geridə qoyub. Reytinqdə Gürcüstanın arxasında ABŞ, Kanada, Yaponiya, Böyük Britaniya, Fransa, Almaniya, Niderland, İtaliya, İsveçrə, İsveç, Danimarka, Norveç, Finlandiya, İspaniya, Belçika, İrlandiya, İslandiya, Portuqaliya, Xorvatiya, Latviya, Litva, Polşa, Macarıstan, Albaniya, Slovakiya, Sloveniya, Yunanıstan, Bolqarıstan, Şimali Makedoniya, Rumıniya və Türkiyə kimi ölkələr qərarlaşıblar,” – deyə açıqlamada qeyd olunur.

Məlumata görə, dünyada BXİ indeksinə görə lider Honkonqdur, Avropada isə birinci yeri Malta tutur. Göstəricilər Dünya Bankının “World Development Indicators” (Dünya İnkişaf Göstəriciləri) məlumat bazası əsasında hazırlanıb.

İndeks son üç il ərzində birbaşa xarici investisiyaların ölkə iqtisadiyyatında payını ölçür və aşağıdakı amilləri nəzərə alır: səhm kapitalı, yenidən investisiya edilmiş mənfəət, uzunmüddətli və qısamüddətli investisiya axınları. Bu göstəricilər balans hesabatı əsasında hesablanır və ölkəyə daxil olan xalis investisiyaları – yəni yeni sərmayələri (çıxan axınların, yəni de-investisiyaların çıxılması ilə) əks etdirir.

Bu metodologiya investisiya mühitinin etibarlılığını və xarici sərmayələrin ölkə iqtisadiyyatına real təsirini obyektiv şəkildə dəyərləndirməyə imkan verir.