Tbilisi meri seçki məntəqəsində: “Sülhü qorumağın yeganə yolu – “Gürcü Arzusudur”

Ölkədə sülhün və sabitliyin qorunmasını yalnız “Gürcü Arzusu – Demokratik Gürcüstan” partiyası təmin edə bilər.

InterPress.gr xəbər verir ki, bu barədə Tbilisinin meri Kaxa Kaladze səsvermədə iştirak etdikdən sonra jurnalistlərə açıqlamasında bildirib.

“Seçimimi etdim. İlk növbədə deyirəm – sülh Gürcüstana və daha çox xeyir Tbilisiyə. Bu gün ölkədə sülhü qorumağa real gücü olan yeganə qüvvə ‘Gürcü Arzusu – Demokratik Gürcüstan’dır. Eləcə də şəhərin inkişafını davam etdirməyə qadir yeganə qüvvə də bu partiyadır. Son illərdə paytaxt üçün çox sayda mühüm layihə həyata keçirdik, amma hələ də həllini gözləyən problemlər qalır,” – deyə Kaladze bildirib.

O əlavə edib ki, növbəti dörd il Tbilisinin inkişafı baxımından həm maraqlı, həm də əhəmiyyətli olacaq:

“Seçki kampaniyası dövründə ictimaiyyətə konkret baxışlarımızı təqdim etdik – infrastruktur, ekologiya, səhiyyə, sosial proqramlar, tramvay və metro kimi nəqliyyat layihələri, eləcə də əyləncə parklarının yaradılması. Qarşıdakı illər Tbilisi üçün çox mühüm olacaq,” – deyə mer vurğulayıb.