Salome Zurabişvili: “Gürcü Arzusu” getdikcə daha çox antiamerikan və prorusiya mövqeyinə keçir”

ABŞ Konqresinin Helsink Komissiyasında keçirilən dinləmədə Gürcüstanın beşinci prezidenti Salome Zurabişvili çıxış edərək “Gürcü Arzusu” partiyasını ABŞ-a qarşı açıq şəkildə düşmən mövqeyi tutmaqda və Rusiyaya yaxınlaşmaqda ittiham edib.

InterPress.e xəbər verir ki, dinləmə “Tərəfdaşlıqdan Problemlərə: Gürcüstanın Antiamerikan Yönümü” başlığı altında baş tutub.

Salome Zurabişvili bildirib ki, hazırkı hakim partiya “Gürcü Arzusu” ABŞ-la strateji tərəfdaşlıqdan uzaqlaşaraq Rusiyaya, Çin və İrana daha çox yaxınlıq nümayiş etdirir:

“Bu gün Gürcüstanda demokratik hüquqlar, azadlıqlar və insan hüquqları baxımından vəziyyət olduqca çətindir. Mən bu gün burada həbsdə olan insanlar adından da danışıram. Məsələn, səbəbsiz həbsdə saxlanılan qadın jurnalist Mzia Amaglobeli.”

Zurabişvili qeyd edib ki, Gürcüstan ABŞ üçün Cənubi Qafqazda Rusiya üzərində sülh yolu ilə əldə olunmuş strateji qələbə idi. Lakin indi, 30 ildən sonra Gürcüstanın hakimiyyəti bu tərəfdaşlıqdan imtina edir.

 

Zurabişvili iddia edib ki, “Gürcü Arzusu” rəhbərləri açıq şəkildə ABŞ rəsmilərinə hücum edirlər, o cümlədən Tiflisdəki ABŞ səfirinə qarşı, ABŞ-ı Rusiyaya qarşı “ikinci cəbhə” açmaqda ittiham edirlər, keçmiş prezident Donald Trampa və onun administrasiyasına qarşı sərt ritorikadan istifadə edirlər.

Zurabişvili əlavə edib ki, “Gürcü Arzusu” liderləri Rusiya, Çin və İranla əməkdaşlığı genişləndirir:

Rus liderlərin ritorikasını təkrarlayırlar.

Çinlə strateji tərəfdaşlıq Anklia layihəsində ön plandadır.

Çin və İran vətəndaşları üçün vizasız rejim tətbiq olunur.

O bildirib ki, bu yaxınlaşmalar ABŞ ilə strateji tərəfdaşlığın zəiflədilməsi ilə paralel baş verir.

Zurabişvili ABŞ-la münasibətlərin Gürcüstan üçün əvəzsiz dəyərə malik olduğunu vurğulayıb:

“Gürcüstan ABŞ üçün strateji qələbə idi və bu, Rusiyanın yüz ildən çox müddətdə bölgəyə hökmranlıq cəhdlərinə son qoymuşdu. İndi isə ölkə ABŞ-dan uzaqlaşaraq, onun rəqiblərinə yaxınlaşır.”

Zurabişvili öz çıxışında bir daha vurğulayıb ki, Gürcüstanda oktyabr ayında keçiriləcək seçkilər adi demokratik proses deyil, “rus xüsusi əməliyyatıdır”. O, beynəlxalq ictimaiyyəti Gürcüstanın demokratik gələcəyini qorumağa çağırıb.