Məmuka Xazaradzedən həbsxanadan müraciət: "Heç bir meydanı mübarizəsiz İvanişvilinin Gürcü Arzusu-na buraxmamalıyıq"

“Lelo – Güclü Gürcüstan” partiyasının lideri Mamuka Xazaradze həbsxanadan yayımladığı müraciətində bildirib ki, heç bir meydanı mübarizəsiz “Gürcü Arzusu”na buraxmaq olmaz, istər bərabər, istərsə də bərabərsiz şəraitdə.

InterPress.ge xəbər verir ki, müraciət onun sosial şəbəkədəki şəxsi səhifəsində dərc olunub.

Mamuka Xazaradze qeyd edib ki, hətta məhdud informasiya şəraitində belə hiss edir ki, bəzi müxalifət partiyalarının nümayəndələri "Lelo"nu hədəfə çevirib və partiyaya qarşı kampaniya aparacaqlarını elan ediblər.

O, bütün müxalifət qüvvələrini 2024-cü ildə seçkilərdə qazanılmış şəhərlərdə və Tbilisidə birgə mübarizəyə çağırıb.

Xazaradzenin məktubunda deyilir:

“Lelo”nun yaradılmasının iki əsas səbəbi vardı: birincisi, açıq-aşkar Rusiyapərəst siyasət apararaq ölkənin milli maraqlarını tapdalayan “Gürcü Arzusu”nu məğlub etmək; ikincisi isə illərlə formalaşmış “Gürcü Arzusu–Vahid Milli Hərəkat” ikili monopoliya sistemini qırmaq və mərkəzdə dayanan seçiciyə səsini reallaşdırmaq, ölkənin inkişafında iştirak etmək imkanı vermək.

O vurğulayıb ki, bu illər ərzində "Lelo" həmişə mübarizənin ön cəbhəsində olub, birləşmiş müxalif cəbhənin yaradılması təşəbbüskarı olub və bunun üçün dəfələrlə müxtəlif təşəbbüslərlə çıxış edib.

Xazaradze qeyd edib ki, 2021-ci ilin bələdiyyə seçkilərində öz seçicilərinin narazılığına səbəb olan qərarlar belə, müxalifət birliyi naminə atılıb.

“Lelo”nun lideri təəssüflə bildirib ki, 2024-cü il parlament seçkilərinin nəticələrinin saxtalaşdırılmasından sonra onların mandatdan imtinası alternativ parlament və ya müxalif siyasi mərkəzlə nəticələnmədi. Yerli seçkilərlə bağlı digər müxalif partiyalarla normal dialoq da baş tutmadı.

Mamuka Xazaradze bəzi müxalif liderlərin açıq təzyiq və bəzən də “bulling” elementləri ilə müşayiət olunan televiziya brifinqləri vasitəsilə ünsiyyət qurmağa çalışdıqlarını tənqid edib və bildirib ki, kimsə bunu "Lelo"nun zəifliyi kimi qiymətləndirib.

O əlavə edib ki, bu cür təzyiqlər və kampaniyalar onların qərarına təsir etməyəcək:

“Bizim məqsədimiz bu ölkədə siyasi sistemi və rejimi dəyişməkdir. Əsas iki tələbimiz var və qalır: yeni parlament seçkilərinin keçirilməsi və siyasi məhbusların azadlığa buraxılması. Bura isə emosional çağırışlarla deyil, ağılla çatmaq lazımdır.

"Biz hesab edirik ki, 'Gürcü Arzusu'na heç bir meydanı mübarizəsiz buraxmamalıyıq, istər bərabər, istər bərabərsiz şəraitdə. Gürcü xalqının tarixi məhz belə bərabərsiz mübarizələrlə formalaşıb və dövlətçiliyimiz bu cür mübarizələrlə qorunub saxlanılıb. Bu bir prosesdir, elə bir dəfəlik akt deyil ki, sabah yuxudan oyanıb hər şeyin dəyişdiyini görək."

Xazaradze həmçinin bildirib ki, müxalifət daxilində qarşılıqlı anlaşma və birliyi, rəqibi və düşməni tanımağı öyrənmək vacibdir:

“Hətta məhdud informasiya şəraitində də hiss edirəm ki, bəzi müxalifət partiyalarının nümayəndələri 'Lelo'nu hədəfə alıb və kampaniya aparacaqlarını elan ediblər.

Dostcasına müraciət edirəm: bu kampaniya nəticəsiz qalacaq. Düşmən və rəqib kimdir, hər kəsə bəllidir və diqqətimizi onlara yönəltməliyik!

Bir daha hamıya müraciət edirəm – Tbilisidə və 2024-cü ildə müxalifətin qalib gəldiyi şəhərlərdə qüvvələrimizi birləşdirək. 'Gürcü Arzusu'na bütün səviyyələrdə sistemi möhkəmləndirmək imkanı verməyək. Qarşımızda yeni seçkilər var və ora yalnız mübarizə ilə getmək olar, boikotla deyil. Boikotun sonrasına dair konkret plan isə hələlik yoxdur. Ən azı, indiyədək heç kim izah etməyib ki, 4 oktyabr seçkilərinin ertəsi gün nə olacaq – 'Gürcü Arzusu'nun daha da güclənməsindən başqa."

“Birlik, mübarizə və bir-birimizi dinləmək qələbənin əsas şərtləridir!”

Məktubun sonunda qeyd edilir:

“Sizin Mamuka Xazaradze, Kamera 208”.